नशेखोराचा कहर : आधी लिफ्ट मागितली, नंतर रस्‍त्‍यात गाडी थांबवून दारू पिण्यासाठी पैसे मागत १८ वर्षीय तरुणाला बेदम मारहाण, मनपा आयुक्‍तांच्या निवासस्थानाजवळील घटना

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : नशेखोराने आधी घरी सोड म्हणून १८ वर्षीय तरुणाला लिफ्ट मागितली. त्यानंतर मध्येच गाडी थांबवायला सांगून दारू पिण्यासाठी पैसे मागत त्याला बेदम मारहाण केली. यात तरुण जखमी झाला आहे. ही घटना मनपा आयुक्तांच्या निवासस्थानासमोरील रोडवर सोमवारी (१० नोव्हेंबर) रात्री ११ च्या सुमारास घडली. सिटी चौक पोलिसांनी नशेखोराविरुद्ध गुन्हा दाखल केला आहे.

कार्तिक दीपचंद बनसोडे (वय १८, रा. हर्षनगर) याने या प्रकरणात तक्रार दिली आहे. तो आई-वडील व लहान बहिणीसह राहतो. गजानन हॉस्पिटलमध्ये तो साफसफाई कामगार आहे. सोमवारी (१० नोव्हेंबर) रात्री १० ला तो दिल्लीगेट येथे चहा पिण्यासाठी गेला होता. परतत असताना ओळखीचा व घराजवळ राहणाऱ्या राहुल हंसराज मिसाळ (रा. हर्षनगर) याने कार्तिकला थांबवले आणि घरी सोडायला सांगितले. कार्तिकने त्याला मोटारसायकलीवर बसवले आणि घरी येऊ लागला. रात्री ११ च्या सुमारास मनपा आयुक्तांच्या निवासस्थानासमोरील रोडवर आले असता राहुलने गाडी थांबवायला सांगितले. कार्तिकने गाडी थांबवली असता त्याने दारू पिण्यासाठी पैसे मागितले. कार्तिकने पैसे नसल्याचे सांगितले असता त्याने मारहाण करायला सुरुवात केली.

कार्तिकच्या तोंडात, पोटात हाताने मारले व डाव्या डोळ्याजवळ हातातील कडे मारले. त्यामुळे कार्तिकच्या डोळ्याजवळ जखम होऊन रक्त निघाले. त्यावेळी कार्तिक पळत चांदणे चौकात आला व घरी आईला कॉल केला. त्यामुळे त्याचे आई व वडील लगेच चांदणे चौकात आले. सर्व जण मनपा आयुक्तांच्या निवासस्थानाजवळ गेले असता राहुल तिथेच उभा होता. कार्तिकच्या आई-वडिलांनी त्याला जाब विचारला असता त्याने, आता तर कमी मारले. यानंतर त्याचा जीव घेईल. काय करायचे ते करा, असे म्हणून निघून गेला. त्यानंतर कार्तिक आणि त्याचे आई-वडील पोलिसांत तक्रार करायला आले. पोलिसांनी राहुलविरुद्ध गुन्हा दाखल केला आहे. अधिक तपास सहायक फौजदार खानदेश पाटील करत आहेत.