छत्रपती संभाजीनगर (मेट्रोपोलिस पोस्ट वृत्तसेवा) : ३२ वर्षीय युवकावर चाकूने सपासप वार करून जीवे मारण्याचा प्रयत्न केल्याप्रकरणी सिडको पोलिसांनी दोघांविरुद्ध गुन्हा दाखल केला आहे. ही घटना सोमवारी २२ डिसेंबरला सायंकाळी साडेसहाच्या सुमारास मिसारवाडीत घडली.
सचिन भास्कर धोत्रे (वय ३२, रा. सावित्रीनगर महादेव मंदिरामागे चिकलठाणा) यांच्यावर सध्या घाटी रुग्णालयात उपचार सुरू असून, सिडको पोलिसांनी त्यांचा जबाब नोंदवला. जबाबानुसार, ते आई- वडील पत्नी व दोन मुलांसह राहतात. ते सिक्युरीटी गार्ड म्हणून नोकरी करतात. सोमवारी सायंकाळी साडेसहाच्या सुमारास ते सावित्रीनगर चिकलठाणा येथून मोटारसायकलीवर बसून त्यांच्या ९ वर्षीय मुलीला आणायला सासरवाडीत मिसारवाडी गल्ली नं. ८ येथे आले.
सासरवाडीत घरासमोर मोटारसायकल उभी करून घरात जात असताना तेथे उभा असलेल्या सतिश साळवे व त्याच्या सोबतच्या त्याच्या मित्राने आवाज दिला व धमकावले. दोघांनी शिवीगाळ करून हाताचापटाने सचिन यांना मारहाण केली. आता याला सोडायचे नाही, याला जीवे मारून टाकू, असे म्हणून सतिशने धारदार चाकूने उजव्या बाजूला पोटावर दोन ठिकाणी व डाव्या बाजूने एक ठिकाणी मारून गंभीर जखमी केले. त्यानंतर सचिनच्या सालीने डायल ११२ वर कॉल करून पोलिसांना बोलावून घेतले. तेव्हा ते दोघे पळून गेले. पोलिसांनी सचिनला घाटी रुग्णालयात दाखल केले. अधिक तपास पोलीस उपनिरीक्षक हरिदास मैदाड करत आहेत.
.jpg)
