छत्रपती संभाजीनगर (मेट्रोपोलिस पोस्ट वृत्तसेवा) : पोलीस पतीने पत्नीला क्षुल्लक कारणावरून लाकडी दांड्याने बेदम मारहाण करून जखमी केले. घाटी रुग्णालयात महिलेवर उपचार करण्यात आले. या प्रकरणी महिलेच्या तक्रारीवरून सिडको पोलिसांनी या पोलिसाविरुद्ध शुक्रवारी (२१ नोव्हेंबर) गुन्हा दाखल केला आहे.
मिसारवाडी भागात राहणाऱ्या २९ वर्षीय महिलेने या प्रकरणात तक्रार दिली आहे. त्यांचे पती छत्रपती संभाजीनगर ग्रामीण पोलीस दलात कार्यरत आहेत. गुरुवारी (२० नोव्हेंबर) महिलेचे पती घरी आले आणि कार रस्त्यातच उभी केली. ती बाजूला लावा, असे सांगायला पत्नी गेली असता, मी पोलीस आहे. माझे कोणी वाकडे करू शकत नाही. तुला माझ्यासोबत राहायचे असेल तर राहा. नाहीतर येथून निघून जा, तू सांगणारी कोण, असे म्हणून पतीने त्यांच्यासोबत वाद घातला. शिवीगाळ करत लाथाबुक्क्यांनी हाता-चापटाने व किचनमध्ये ठेवलेल्या लाकडी दांड्याने मारहाण केली.
यात महिला जखमी झाली. जीवे मारण्याची धमकीही पतीने दिले. महिलेने हेल्पलाइन ११२ वर कॉल केल्यानंतर सिडको पोलीस तातडीने घटनास्थळी धावले. पोलिसांसह महिलेचे नंदोई त्याला समजावून सांगत असताना तो कोणाचेही ऐकून घेत नव्हता, असे महिलेने तक्रारीत म्हटले आहे. महिलेच्या लहान बहिणीने आईला कॉल करून सांगितल्यानंतर महिलेचे आई, भाऊ आणि बहीण घरी आले. त्यानंतर महिलेने सिडको पोलीस ठाणे गाठून तक्रार दिली. पतीच्या मारहाणीत जखमी झाल्याने घाटी रुग्णालयात महिलेवर उपचार करण्यात आले. अधिक तपास पोलीस अंमलदार कृष्णा बोऱ्हाडे करत आहेत.
.jpg)
.jpg)
