जे. के. जाधव पिता-पुत्राकडून ‘एमसीए’च्या १३३ विद्यार्थ्यांचे शैक्षणिक नुकसान; कोट्यवधींची फसवणूक, श्री साई इन्स्टिट्यूट ऑफ मॅनेजमेंट अँड रिसर्च सेंटरमधील धक्कादायक प्रकार, पोलिसांनी केला गुन्हा दाखल

छत्रपती संभाजीनगर (मेट्रोपोलिस पोस्ट वृत्तसेवा) : डॉ. बाबासाहेब आंबेडकर मराठवाडा विद्यापीठाची संलग्नता नसतानाही चिकलठाण्यातील श्री साई इन्स्टिट्यूट ऑफ मॅनेजमेंट अँड रिसर्च सेंटरने १३३ विद्यार्थ्यांकडून प्रत्येकी १ लाख १० हजार रुपये शुल्क घेऊन प्रवेश दिला. विद्यापीठाच्या परीक्षांना गुरुवारपासून (४ डिसेंबर) सुरुवात झाली, पण हॉलतिकीट न मिळालेले विद्यार्थी कावरेबावरे झाले. त्यांनी विद्यापीठात धाव घेतल्यानंतर संस्थाचालक जे. के. जाधव आणि विक्रांत जाधव या पिता-पुत्राचा चालूपणा समोर आला. त्यामुळे संतप्त झालेल्या विद्यार्थ्यांनी सिडको एमआयडीसी पोलीस ठाण्यात धाव घेतली. एका विद्यार्थिनीच्या तक्रारीवरून पोलिसांनी जाधव पिता-पुत्रासह दोन शिक्षकांविरुद्ध गुन्हा दाखल केला आहे.

श्री साई इन्स्टिट्यूट ऑफ मॅनेजमेंट अँड रिसर्च सेंटरमध्ये यावर्षीपासूनच एमसीए अभ्यासक्रमाला मान्यता मिळाली आहे. प्रथम वर्षासाठी तब्बल १३३ विद्यार्थ्यांनी ‘सीईटी सेल’च्या माध्यमातून प्रत्येकी १ लाख १० हजार रुपये शुल्क भरून प्रवेश घेतला. परीक्षेसाठी त्यांना बुधवारी रात्रीपर्यंत हॉलतिकीटच मिळाले नाही, गुरुवारी सकाळी ते परीक्षा केंद्रावर पोहोचले. मात्र, हॉलतिकीट नसल्याने परीक्षेला बसू दिले जात नव्हते. त्यामुळे विद्यार्थ्यांनी जे. के. जाधव पिता-पुत्राला संपर्क केला. त्यांनी ही विद्यापीठाची चूक असल्याचा दावा केला. गोंधळून गेलेल्या विद्यार्थ्यांनी कॉलेज गाठले असता कॉलेजचे दरवाजे बंद करण्यात आले. त्यामुळे विद्यार्थ्यांनी सिडको एमआयडीसी पोलीस ठाणे गाठले. विद्यार्थ्यांची अडचण पोलिसांनी गांभीर्याने घेतली. पोलीस आयुक्त प्रवीण पवार, पोलीस उपायुक्त प्रशांत स्वामी यांनी कुलगुरू डॉ. विजय फुलारी यांच्याशी संपर्क साधला. प्रशांत स्वामी यांनी स्वतः विद्यापीठ गाठले. विद्यार्थ्यांनीही विद्यापीठात धाव घेतली.

त्यावेळी कॉलेजच्या एमसीए अभ्यासक्रमाला विद्यापीठाची संलग्नताच नसल्याचे विद्यापीठाकडून स्पष्ट करण्यात आले. तसा निर्णयसुद्धा २४ नोव्हेंबरला विद्यापीठाने कॉलेज प्रशासनाला कळवल्याचे सांगण्यात आले. संलग्नता नसतानाही विद्यार्थ्यांना कॉलेजमध्ये प्रवेश देऊन जाधव पिता-पुत्राने फसवल्याने या प्रकरणात पोलिसांनी गुन्हा दाखल केला आहे. संस्थाचालक जे. के. जाधव, त्याचा मुलगा विक्रांत जाधव आणि शिक्षक संघपाल कांबळे, लक्ष्मण गायकवाड यांच्याविरोधात गुन्हा दाखल केल्यानंतर लगेचच पोलिसांनी दोन्ही शिक्षकांना उच्च न्यायालयाच्या परिसरातून अटक केली. जाधव पिता-पूत्र पळून गेले आहेत. त्यांचा कसून शोध घेतला जात आहे. अधिक तपास सहायक पोलीस निरीक्षक भरत पाचोळे करत आहेत. अनेक विद्यार्थ्यांच्या पालकांनी व्याजाने पैसे घेऊन कॉलेजचे शुल्क भरले. मात्र त्यांना परीक्षेपासून वंचित राहावे लागल्याने त्यांच्या डोळ्यांत अश्रू तरळले होते.

एमबीएच्या १६ विद्यार्थ्यांना हायकोर्टाच्या आदेशाने हॉलतिकीट
दरम्यान, मुंबई उच्च न्यायालयाच्या औरंगाबाद खंडपीठाच्या आदेशाने याच श्री साई इन्स्टिट्यूट ऑफ मॅनेजमेंट अॅण्ड रिसर्च सेंटरच्या एमबीए अभ्यासक्रमाच्या १६ विद्यार्थ्यांना हॉलतिकीट उपलब्ध करून दिल्याची माहिती प्र- कुलगुरू डॉ. वाल्मीक सरवदे यांनी दिली. या विद्यार्थ्यांचे परीक्षा अर्ज बुधवारी (३ डिसेंबर) सायंकाळी शुल्कासह भरून घेण्यात आले. त्यानंतर रात्री ९ च्या सुमारास परीक्षा विभागाने हॉलतिकीट दिले. श्री साई इन्स्टिट्यूट ऑफ मॅनेजमेंट ॲण्ड रिसर्च सेंटरमध्ये एमबीएच्या अभ्यासक्रमासाठी १९ विद्यार्थ्यांनी प्रवेश घेतलेला आहे. त्यांनी विद्यापीठाच्या परीक्षा शुल्काचे पैसे कॉलेजकडे जमा केले. मात्र कॉलेजने पैसे आणि त्यांचे अर्ज विद्यापीठात जमाच केले नाहीत. त्यामुळे विद्यापीठाने विद्यार्थ्यांना हॉलतिकीट दिले नव्हते. कॉलेजने फसवल्याचे लक्षात आपल्यावर त्यांनी लगेचच खंडपीठात धाव घेतली. त्यात खंडपीठाने १९ विद्यार्थ्यांना हॉलतिकीट देण्याचे आदेश विद्यापीठाला दिले. १९ पैकी १६ विद्यार्थ्यांनी परीक्षा अर्ज आणि शुल्क भरून हॉलतिकीट प्राप्त केले. 

ना शिक्षक, ना संगणक, ना पुस्तके...
श्री साई इन्स्टिट्यूट ऑफ मॅनेजमेंट अॅण्ड रिसर्च सेंटरमध्ये विद्यापीठाच्या समितीने तपासणी केली असता विद्यार्थ्यांना शिकविण्यासाठी प्राचार्य, शिक्षक, संगणक, ग्रंथालयात पुस्तके उपलब्ध नव्हती. त्यामुळे २४ नोव्हेंबरला विद्यापीठाने प्रथम वर्ष संलग्नता फेटाळली होती, असे समोर आले आहे.