बिडकीन (मेट्रोपोलिस पोस्ट वृत्तसेवा) : दारूच्या नशेत झालेल्या वादातून मित्रानेच मित्राचा गळा दाबून खून केला. ही धक्कादायक घटना पैठण तालुक्यातील बिडकीन पोलीस ठाण्याच्या हद्दीत पैठणखेडा येथे गुरुवारी (१२ मार्च) दुपारी ३ च्या सुमारास घडली. नवनाथ नामदेव भादे (वय ४०, रा. पैठणखेडा) असे हत्या झालेल्याचे नाव असून, बिडकीन पोलिसांनी संशयित मारेकरी विष्णू बापू घोंगार्डे (वय ४५, रा. पैठणखेडा) याला अटक केली आहे. अवघ्या २४ तासांत पोलिसांनी या खुनाचा उलगडा केला.
पोलीस सूत्रांच्या माहितीनुसार, नवनाथ आणि विष्णू मित्र होते. गुरुवारी दुपारी ३ च्या सुमारास दोघे विष्णूच्या घरात दारू पित होते. नशेत त्यांच्यात शाब्दिक चकमक सुरू झाली. त्याचे रुपांतर हाणामारीत झाले. संतापलेल्या विष्णूने नवनाथला बेदम मारहाण करत त्याचा गळा दाबला. यात नवनाथचा जागीच मृत्यू झाला. गुरुवारी सायंकाळी ६ च्या सुमारास नवनाथचा मृतदेह विष्णूच्या घरात आढळल्याने गावात खळबळ उडाली होती. बिडकीन पोलिसांनी आकस्मिक मृत्यूची नोंद करून तपास सुरू केला.
नवनाथच्या नातेवाइकांनी घातपाताचा संशय व्यक्त केल्याने विष्णूला ताब्यात घेऊन पोलिसांनी कसून चौकशी केली असता, त्याने गुन्ह्याची कबुली दिली. नवनाथचा चुलतभाऊ संदीप पंढरीनाथ भादे यांनी शुक्रवारी दुपारी दोनला बिडकीन पोलीस ठाण्यात तक्रार दिली. त्यावरून विष्णूविरुद्ध खुनाचा गुन्हा दाखल करून अटक करण्यात आली. तपास सहायक पोलीस निरीक्षक नीलेश शेळके यांच्या मार्गदर्शनाखाली पोलीस अंमलदार संजीवन कदम यांनी केला.
.jpeg)
