दारूड्याने सुसाट कार निवडणूक पथकावर चढवली!; १ कर्मचारी जखमी, छत्रपती संभाजीनगरची घटना

छत्रपती संभाजीनगर (मेट्रोपोलिस पोस्ट वृत्तसेवा) : मनपा निवडणुकीच्या पार्श्वभूमीवर वाहनांची तपासणी करणाऱ्या स्थिर सर्वेक्षण पथकावर दारूड्याने थेट कार घातली. यात पथकातील सचिन वाणी हे कर्मचारी गंभीर जखमी झाले. कारचालक आनंद उत्तम कर्डिले (वय ४५, रा. गुलमोहर कॉलनी) याच्याविरुद्ध सातारा पोलिसांनी गुन्हा दाखल केला आहे. ही घटना गुरुवारी (८ जानेवारी) रात्री ११:३० च्या सुमारास गोलवाडी रस्त्यावरील ईटखेडा परिसरात घडली.

निवडणुकीमुळे पैशासह अन्य बेकायदेशीर वाहतूक रोखण्यासाठी शहरात ठिकठिकाणी स्थिर सर्वेक्षण पथक तैनात करण्यात आले आहे. डॉ. बाबासाहेब आंबेडकर मराठवाडा विद्यापीठाच्या ग्रंथालयात कार्यरत सचिन गाडेकर, मनोज चव्हाण, सचिन वाणी, अनिकेत मगरे, पोलीस अंमलदार रितेश जाधव यांचे स्थिर सर्वेक्षण पथक गोलवाडी रस्त्यावरील ईटखेडा परिसरात नियुक्त केले आहे. हे पथक बॅरिकेटिंग करून वाहनांची तपासणी करत असताना रात्री ११:३० च्या सुमारास कर्डिले हा कारने (क्र. एमएच २० डीव्ही ६०८०) सुसाट आला.

थांबण्याऐवजी सरळ तपासणी सुरू असलेल्या कारवर येऊन आदळला. अति वेगामुळे धडक दिलेल्या कारसह कर्डीलेच्याही कारचे नुकसान झाले. वाणी यांच्या अंगावर कार आल्याने पथकातील सारेच घाबरून गेले. वाणी यांना गंभीर जखमी अवस्थेत रुग्णालयात हलविण्यात आले. त्यांचा पाय फ्रॅक्चर झाला असून, डोक्यालाही इजा झाली आहे. साताऱ्याच्या पोलीस उपनिरीक्षक निर्मला राख यांनी घटनास्थळी धाव घेत कर्डिलेला ताब्यात घेतले. तो बराच प्यायलेला होता. अडखळत त्याने त्याचे नाव सांगितले. त्याच्याविरुद्ध गुन्हा दाखल करण्यात आला आहे.