छत्रपती संभाजीनगर (मेट्रोपोलिस पोस्ट वृत्तसेवा) : बजाजनगरात दारूड्यांनी कहर केला आहे. ते कोणत्याही कारणावरून वाद सुरू करतात आणि हाणामाऱ्या करत आहेत. गुरुवारी (२७ नोव्हेंबर) रात्री सव्वा दहाच्या सुमारास बजाजनगरातील शिवराणा चौकात ३ दारूड्यांनी हॉटेलच्या वेटर आणि त्याच्या भावाला बेदम मारहाण केली. लोखंडी गजाने वेटरचे डोके फोडले. हे दोन्ही भाऊ कामावरून स्कुटीने घरी परतत होते.
आनंद दादाराव पगडे (वय १९, रा. सिडको वाळूज महानगर) याने या प्रकरणात तक्रार दिली आहे. तो आई, वडील व भाऊ शुभमसह राहतो. तो जय भवानी चौकातील तुळजा भोजनालयात वेटर आहे. गुरुवारी (२७ नोव्हेंबर) तुळजा भोजनालयातून कामाला सुटी झाल्यानंतर रात्री सव्वा दहाला शुभम त्याला स्कुटी घेऊन घ्यायला आला. दोघे स्कुटीने (क्र. एमएच २०, जीडब्ल्यू ५२८४) घरी येत असताना रात्री साडेदहाला बजाजनगरातील शिवराणा चौकात आले. वाहतूक जास्त असल्याने त्यांनी गाडी थांबवली. त्याचवेळी तेथे एक व्यक्ती दारू पिलेल्या अवस्थेत आला. त्याने तुम्ही आमच्या घरासमोर का थांबले?, असे म्हणत आनंद व शुभमसोबत वाद सुरू केला.
शिवीगाळ करत त्याने त्याच्या मोबाइलवरून कॉल करून त्याच्या दोन साथीदारांना बोलावून घेतले. तिघांनी मिळून लोखंडी गजाने आनंद व शुभमला मारहाण केली. डोक्यात गज मारल्याने आनंद जखमी झाला. त्यानंतर तिघेही कारमधून निघून गेले. आनंद व शुभमने आजूबाजूला राहणाऱ्या मुलांकडे चौकशी केली असता हल्लेखोराचे नाव सौरभ देशमुख (रा. शिवराणा चौक बजाजनगर) असे समजले. घाटी रुग्णालयात उपचार घेतल्यानंतर शुक्रवारी आनंदने वाळूज एमआयडीसी पोलीस ठाण्यात तक्रार दिली. त्यावरून पोलिसांनी सौरभ देशमुख व त्याच्या दोन साथीदारांविरुद्ध गुन्हा दाखल केला आहे. अधिक तपास पोलीस अंमलदार संतोष सूर्यवंशी करत आहेत.
.jpg)
.jpg)
