Follow up Story : सिंधी कॉलनीत ३ माळ्यांची बिल्डिंग, २० खोल्या, तरुण-तरुणी एकत्रच राहत होते, फारूकी बसल्याजागी सर्व काही पुरवायचा...

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : अवैध आंतरराष्ट्रीय कॉल सेंटरमध्ये काम करत असलेल्या अधिकारी, कर्मचाऱ्यांसाठी सिंधी कॉलनीतील बंगला क्र. ५६ भाड्याने घेण्यात आला होता. या ३ माळ्याच्या इमारतीची पोलिसांनी शुक्रवारी (३१ ऑक्‍टोबर) तीन तास झाडाझडती घेतली. २० हून अधिक खोल्या आढळल्या. दहापेक्षा अधिक लॅपटॉप, क्रेडिट कार्ड व घोटाळ्यासाठी वापरल्या जाणाऱ्या राष्ट्रीय, आंतरराष्ट्रीय स्तरावरील बनावट शासकीय कागदपत्रांचे गठ्ठे सापडले. मुख्य संशयितांपैकी एक असलेल्या भाविक पटेलचा पासपोर्टही मिळून आला.

चिकलठाणा एमआयडीसीतील आयटी पार्कमध्ये आयआरएस इंटर्नल रेव्हेन्यू सर्व्हिस इन्व्हेस्टिगेशन डिपार्टमेंट नावाने सायबर गुन्हेगारांनी अवैध आंतरराष्ट्रीय कॉल सेंटर उघडले होते. त्यावर सिडको एमआयडीसी पोलिसांनी मंगळवारी (२८ ऑक्‍टोबर) छापा मारून ११६ तरुण-तरुणींना ताब्यात घेतले होते. त्यांच्याकडून ११९ लॅपटॉप व मोबाइलसह अन्य तांत्रिक, डिजिटल साधने असा कोट्यवधी रुपयांचा मुद्देमाल जप्त केला होता. या कॉल सेंटरमधून अमेरिकेन नागरिकांना कॉल, मेसेज करून करचुकवल्याबद्दल भीती दाखवून किंवा वेगवेगळ्या योजनांची आमिषे दाखवून कोट्यवधी रुपयांनी गंडवले जात होते.

पोलिसांनी आतापर्यंत भावेश प्रकाश चौधरी (वय ३४), भाविक शिवदेव पटेल (वय २७), सतीश शंकर लाडे (वय ३५), वलय पराग व्यास (वय ३३, सर्व रा. अहमदाबाद, गुजरात), अजय ठाकूर आणि मनवर्धन राठोडसह रॅकेटचा मास्टरमाइंड अब्दुल फारुक मुकदम शाह ऊर्फ फारुकी या प्रमुख संशयितांना अटक केली असून, शुक्रवारी त्यांची समोरासमोर बसवून पोलीस उपायुक्त प्रशांत स्वामी, निरीक्षक गीता बागवडे यांनी कसून चौकशी केली.

एकत्रच राहत होते तरुण-तरुणी...
फारूकीने सहा प्रमुख संशयितांसह ११४ कर्मचाऱ्यांना राहण्यासाठी सिंधी कॉलनीतील बंगला क्र. ५६ भाड्याने घेतला होता. तरुण-तरुणी एकत्रच राहत होते. त्यांना दिवसभर बाहेर कुठेही जाण्याची अनुमती नव्हती. पगाराव्यतिरिक्त त्यांचा सर्व खर्च फारुकीकडून केला जायचा. अटकेतील सात मुख्य संशयितांसह सध्या न्यायालयीन कोठडीत असलेल्या कर्मचारी तरुण-तरुणींकडून रॅकेट कसे चालायचे, प्रशिक्षण कोणी दिले याबाबची माहिती पोलीस घेणार आहेत. या गुन्ह्याच्या तपासाची माहिती अमेरिकन तपास संस्था एफबीआयसुद्धा घेत आहे. एफबीआयच्या दिल्लीस्थित कार्यालयातील अधिकारी शहर पोलिसांच्या संपर्कात असल्याचे सांगण्यात येत आहे. ज्या अमेरिकन नागरिकांची फसवणूक झाली, त्यांची माहिती लवकरच ई-मेलद्वारे मागवण्यात येणार आहे.