छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : क्लासेससाठी स्कुटीने येणाऱ्या १६ वर्षीय मुलीवर ओळखीच्या २७ वर्षीय तरुणाने प्राणघातक हल्ला केला. धारदार शस्त्राचा वार तिच्या डाव्या हातावर लागला. तरुणीने प्रसंगावधान राखून स्कुटी न थांबवता थेट क्लासेसमध्ये आली आणि वॉचमनला घडलेला प्रकार सांगत त्यांच्या मोबाइलवरून वडिलांना कळवले. हा धक्कादायक प्रकार मंगळवारी (१४ ऑक्टोबर) सकाळी साडेसातच्या सुमारास कलाग्रामसमोर घडला.
मुलीच्या काकाने या प्रकरणात सिडको एमआयडीसी पोलीस ठाण्यात तक्रार दिली. त्यावरून पोलिसांनी नितीन आहेर पाटील (वय २७, रा. हर्सूल) या तरुणाविरुद्ध गुन्हा दाखल केला आहे. मुलगी नंदनवन कॉलनी भागात राहते. ती फिजिक्सवाला क्लासेसमध्ये १२ वीचे क्लासेस करते. मंगळवारी सकाळी आठच्या सुमारास मुलीने वडिलांना क्लासमधून कॉल करून सांगितले, ती गाडीवर जात असताना कोणीतरी तिच्या डाव्या हातावर काहीतरी धारदार वस्तूने मारून जखमी केले आहे. ही बाब तिच्या वडिलांनी भावाला सांगितली. त्यांचे भाऊ लगेचच फिजिक्सवाला क्लासेसकडे आले.
त्यांनी पुतणीला विचारले असता तिने सांगितले, की सकाळी साडेसातच्या सुमारास कलाग्राम समोरच्या रोडने ती फिजिक्सवाला क्लासकडे इलेक्ट्रीक स्कुटीवरून जात असताना ओळखीचा तरुण नितीन आहेर पायी जात होता. त्याने तिच्याकडे पाहून शिविगाळ करत डाव्या हातावर काहीतरी धारदार वस्तूने मारून जखमी केले. तिने स्कुटी न थांबवता थेट फिजिक्सवाला क्लास येथे आले. तेथील वॉचमन यांच्या फोनवरून वडिलांना कॉल केला. तिच्या काकाने तिला घेऊन घाटी रुग्णालय गाठले. तिथे उपचार घेतल्यानंतर त्यांनी सिडको एमआयडीसी पोलीस ठाणे गाठून घडलेला प्रकार सांगितला. पोलिसांनी नितीन आहेर पाटील याच्याविरुद्ध गुन्हा दाखल केला आहे. अधिक तपास साहेबखान पठाण करत आहेत.
.jpg)
.jpg)
