भारतनगरात कुख्यात गुन्हेगाराचा कहर : २५ वर्षीय तरुणाला चाकूने जीवे मारण्याची धमकी देत लुटले!

छत्रपती संभाजीनगर (मेट्रोपोलिस पोस्ट वृत्तसेवा) : कुख्यात गुन्हेगार साईनाथ ऊर्फ पिन्या गणेश खडके (वय २२, रा. भारतनगर) याने २५ वर्षीय तरुणाला चाकूने जीवे मारण्याची धमकी देत लुटले. ही घटना भारतनगरात बुधवारी (३ डिसेंबर) सकाळी ८ ला घडली. बुधवारीच रात्रीच पिन्याच्या मुसक्या पुंडलिकनगर पोलिसांनी आवळल्‍या.

ओंकार बाबासाहेब शिंदे (वय २५, रा. गुरुदत्तनगर) या तरुणाने या प्रकरणात तक्रार दिली आहे. तो एका औषधी कंपनीत काम करतो. भारतनगरमधून जात असताना पिन्याने गाठले आणि चाकूने जीवे मारण्याची धमकी देत १० हजार रुपये मागितले. ओंकारने त्याला ५ हजार रुपये ऑनलाइन पाठवले. ओंकारने घाबरून पैसे दिल्याचे पाहून पिन्याचा साथीदार हारुणही दुपारी दोनला ओंकारच्या घरी गेला. शस्त्राचा धाक दाखवून त्याला आणखी ७ हजार रुपयांची मागणी केली.

मात्र, त्याच्या नकळत ओंकारने घरातून पळ काढत थेट पुंडलिकनगर पोलीस ठाणे गाठले. याच काळात पिन्या लुटलेले पैसे घेऊन न्यायालयात गेला होता. तिथून बाहेर पडताच वाहतूक पोलिसांनी त्याला दुचाकीला नंबर प्लेट नसल्याने पकडले. त्याच्याकडे चाकू मिळून आल्याने त्याला क्रांती चौक पोलिसांच्या ताब्यात देण्यात आले. क्रांतीचौक पोलिसांनी सोडल्यानंतर पुंडलिकनगर पोलिसांनी रात्री त्याला अटक केली. त्याच्याविरुद्ध ६ गुन्हे दाखल आहेत. तो खिशात चाकू घेऊनच फिरतो. वृत्त लिहीपर्यंत हारुणला पोलिसांनी अटक केलेली नव्हती. न्यायालयाने पिन्याला दोन दिवसांची पोलीस कोठडी सुनावल्याचे पुंडलिकनगरचे पोलिस निरीक्षक अशोक भंडारे यांनी सांगितले.