छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगरमध्ये पैठण गेटजवळ झालेल्या हत्येमुळे अवघे शहर शॉक्ड आहे. मृतक युवक सिल्लेखान्यातील रहिवासी होता, तर मारेकरी घटनास्थळाजवळीलच सब्जीमंडीतील रहिवासी... या हत्येमुळे सिल्लेखान्यात संताप आहे. सिल्लेखान्यातील १५ ते २० जणांचा जमाव मंगळवारी दुपारी दोनदा सब्जीमंडीत घुसला आणि १५ ते २० वाहनांची तोडफोड केली. नागरिक इतके दहशतीखाली आहेत, की वाहनाचे नुकसान होऊनही पोलीस ठाण्यात जाऊन तक्रार देण्यास कुणीही धजावले नाही. अखेर पोलिसांनी स्वतःहून तक्रार देत तोडफोडीप्रकरणी जमावाविरुद्ध गुन्हा दाखल केला आहे.
पोलीस अंमलदार शेख अर्शद शेख लाल यांनी याप्रकरणात तक्रार दिली आहे. ते गोपनीय शाखेत काम करतात. सोमवारी (१० नोव्हेंबर) रात्री सव्वा दहाला पैठण गेटजवळ एस. एस. मोबाइल शॉपीसमोरील अंडा भुर्जी गाडीसमोर इमरान अकबर कुरेशी (वय ३३, रा. मनपा शाळेसमोर, सिल्लेखाना, छत्रपती संभाजीनगर) याची हत्या झाली. या प्रकरणात क्रांती चौक पोलिसांनी मारेकऱ्यासह त्याला पळून जाण्यात मदत करणाऱ्या तिघांना अटक केली आहे. या खुनाच्या कारणावरून मंगळवारी (११ नोव्हेंबर) दुपारी १ ते दीडच्या सुमारास व दुपारी चार ते साडेचारच्या सुमारास आर.बी. किचन, सब्जी मंडी, पैठण गेट समोरील गल्लीत व बागवान मस्जिद लगतच्या गल्लीत १५ ते २० अनोळखी व्यक्तींनी बेकायदेशीर जमाव जमवून आरडाओरडा करत त्या ठिकाणी राहणाऱ्या नागरिकांच्या अंदाजे १० ते १२ दुचाकी आणि चारचाकी वाहनांचे दगड मारून, काही दुचाकी खाली पाडून नुकसान केले.
हा बेकायदेशीर जमाव सिल्लेखाना येथून आल्याची माहिती पोलिसांना कळली. बंदोबस्तावरील पोलीस अधिकारी आणि अंमलदारांनी पायी गस्ती दरम्यान त्यांना पांगवले. त्यानंतर बेकायदेशीर जमाव सिल्लेखान्यात परत गेला. सिल्लेखान्यातील जमावाच्या भीतीने सामान्य नागरिक त्यांच्या मालमत्तेचे नुकसान होऊनही तक्रार देण्यासाठी पोलीस ठाण्यात न आल्याने पोलिसांनी स्वतःहून तक्रार दिली आहे. अधिक तपास पोलीस उपनिरीक्षक देविदास शेवाळे करत आहेत.
हत्या कुणाची झाली? : इमरान अकबर कुरेशी (वय ३३, रा. सिल्लेखाना)
मारेकरी : शेख परवेज शेख मेहमूद (वय ३६, सब्जीमंडी)
हल्ल्यात जखमी : मृतकाचा चुलत भाऊ चुलत भाऊ इब्राहिम नसीर कुरेशी (वय ३५, रा. सिल्लेखाना) आणि जिजा हारुण उस्मान कुरेशी (रा. मुंबई)
पोलिसांनी अटक केलेले आरोपी : परवेजसह त्याला पळून जाण्यात मदत करणारे शेख खय्युम शेख शरीफ (वय ४२), शेख सलीम शेख शरीफ (३८), शेख फैजल शेख नजीम (वय २३, सर्व रा. सब्जीमंडी).
महत्त्वाचे मुद्दे...
-मंगळवारी पहाटे पाचपर्यंत चारही आरोपींना अटक, न्यायालयाने १७ नोव्हेंबरपर्यंत पोलीस कोठडी सुनावली.
-मंगळवारी सायंकाळी ५ वाजता इमरानवर तणावपूर्ण वातावरण अंत्यविधी करण्यात आले.
-पैठण गेट भागात पोलिसांनी दोनदा रूट मार्च काढून तणाव नियंत्रणात आणण्याचा प्रयत्न केला.
-कुरेशी संघटनेच्या पदाधिकाऱ्यांनी व समाजबांधवांनी सिल्लेखाना महापालिकेच्या झोन कार्यालयात ठिय्या देत पैठण गेट येथील अनधिकृत दुकानांवर कारवाईची मागणी केली.
-मनपाच्या अतिक्रमण निर्मूलन पथकाने दोन दुकानांवर नोटीस चिकटवली. अनधिकृत बांधकामांसदर्भातील ही नोटीस आहे.
-पैठण गेटवरील अन्य अतिक्रमित दुकानांवर लवकरच पोलीस बंदोबस्तात बुलडोझर चालविला जाणार.
घटनेची पार्श्वभूमी...
इब्राहिम नसीर कुरेशी (वय ३५, रा. सिल्लेखाना) यांनी क्रांती चौक पोलिसांत दिलेल्या तक्रारीनुसार, त्यांचा चुलत भाऊ इमरान हा त्यांच्या शेजारीच त्याची आई शहेनाज, भाऊ आवेज, पत्नी नाहेदा आणि चार मुलांसोबत राहत होता. तीन दिवसांपूर्वी इमरानचा पैठणगेट येथील मोबाईल शॉपी मालक सलीम शरीफ शेख याच्यासोबत वाद झाला होता. एस. एस. मोबाईल शॉपीसमोरील भुर्जीच्या गाडीवर भुर्जी खाण्यासाठी इमरान वरचेवर उभा राहत असल्याच्या कारणावरून हा वाद सुरू होता. त्याबाबत शनिवारी (८ नोव्हेंबर) रात्री १० ला कलीम कुरेशी यांच्यासमक्ष त्यांच्यात समझोताही झाला होता. कलीम कुरेशी यांनी इमरान कुरेशी आणि सलीम शेख यांना यापुढे मनात कोणाताही राग न ठेवता झालेला किरकोळ वाद विसरून जाण्यास सांगितले होते. सोमवारी (१० नोव्हेंबर) रात्री सव्वा दहाच्या सुमारास पैठणगेट येथील एस. एस. मोबाईल शॉपीसमोरील अंडा भुर्जी गाडीसमोर इब्राहिम, इमरान आणि त्यांचे मुंबईचे जिजा हारुण उस्मान कुरेशी असे तिघेजण अंडा भुर्जी खात बसले होते. त्यावेळी परवेज शेख याने त्याच्या एम. आर. मोबाईल शॉपीमधून इमरानला आई, बहिणीवरून शिवीगाळ करत इधर क्या देख रहा है, असे विचारले. त्यानंतर तो त्याच्या दुकानामधून अचानक हातात चाकू घेऊन आला. त्याने आल्या आल्या इमरानच्या गळ्यावर वार केला. इमरानच्या गळ्यावर डाव्या बाजूस चाकूचा वार बसल्यामुळे तो गंभीर जखम होऊन कोसळला. त्यावेळी परवेज शेख म्हणाला की, अभी इसका काम हो गया, तू बाकी है, असे म्हणताच इब्राहिम आणि हारुण कुरेशी यांनी त्याला रोखण्याचा प्रयत्न केला. परवेजने त्याच्या हातातील चाकूने हारुण कुरेशी यांच्या छातीवर चाकूचा वार केला. मात्र ते उजव्या बाजूला चपळाईने वळले. त्यामुळे वार उजव्या हाताच्या दंडावर लागला. ते गंभीर जखमी झाले. त्यानंतर परवेजने इब्राहिम यांना मारण्यासाठी चाकू उगारला असता त्यांनी त्याचा हात पकडून ठेवला. त्यावेळी परवेजने त्यांच्या हाताला झटका देऊन हातातील चाकूसह तो एअरटच मोबाईल शॉपी आणि डी. एच. मोबाईल शॉपी या दुकानांमधून खय्युम शरीफ शेख यांच्या मदतीने त्याच्यासोबत बाहेर पळून गेला. इमरान कुरेशी गंभीर जखमी होऊन रस्त्यावरच कोसळला होता. त्याच्या गळ्यातील जखमेतून मोठ्या प्रमाणात रक्त वाहू लागल्याने इब्राहिम आणि जिजा हारुण कुरेशी यांनी इमरानला रिक्षातून घाटी रुग्णालयात नेले. मात्र डॉक्टरांनी त्याला तपासून मृत घोषित केले. अधिक तपास पोलीस निरीक्षक पवन चौधरी करत आहेत.
.jpg)
.jpg)
.jpg)
