सातारा परिसरात चोरट्यांचा कहर; वृद्धेच्या गळ्याला चाकू लावून किडनी बाहेर काढण्याची धमकी देत ९ तोळे सोने लांबवले!

छत्रपती संभाजीनगर (सीएससीएन वृत्तसेवा) : झोपलेल्या वृद्धेच्या गळ्याला चाकू लावून पोट फाडून किडनी बाहेर काढण्याची धमकी देत ९ तोळे सोने व ५ हजारांची रोकड चोरट्यांनी चोरून नेली. ही खळबळजनक घटना बुधवारी (११ सप्‍टेंबर) पहाटे तीनला सातारा परिसरातील साई संस्कृती सोसायटीजवळीलील डिलक्स पार्ककमध्ये घडली.

शांताबाई जयंतीलाल जैन (वय ७२) या मुलगा, सून, नातवंडांसह डिलक्स पार्कमधील रो हाऊसमध्ये राहतात. मंगळवारी रात्री घराच्या तळमजल्यावरील बेडरूममध्ये त्या झोपलेल्या होत्या. पहाटे तीनला तीन चोरटे घरात शिरले. एकाने शांताबाई यांचा गळा दाबला. दुसऱ्याने गळ्याला चाकू लावत मराठीतून आवाज करू नको, आवाज केला तर तुझी किडनी काढून घेईन व मारून टाकेन, अशी धमकी दिली.

मुलगा, सून, नातवंडे पहिल्या मजल्यावर झोपलेले असल्याने त्यांच्या खोलीकडे चोरटे जातील, या भीतीने त्या गुपचूप बसल्या. चोरांनी त्यांच्या गळ्यातील सोनसाखळी, सहा बांगड्या, अंगठ्या, कानातले काढून घेतले. मोबाइल हिसकावून कपाटाचे लॉकर तोडत पाच हजार रोख काढून घेत पळ काढला. चोरटे जाताच शांताबाईंनी आरडाओरड केली. त्यामुळे त्यांचा मुलगा विपुलकुमार खाली धावत आला. शेजारीही धावून आले. ते पाठलाग करण्याच्या शक्यतेने चोरांनी त्यांच्यावर दगड फेकून अंधारात पायी पळ काढला. घटनेची माहिती मिळताच साताऱ्याचे पोलिस निरीक्षक संग्राम ताठे, पोलीस उपनिरीक्षक नंदकुमार भंडारी यांनी घटनास्थळी धाव घेतली. पोलिसांचे श्वान चाटे स्कूलपर्यंत जाऊन घुटमळले. घटनेमुळे नागरिकांत दहशत पसरली आहे. अधिक तपास उपनिरीक्षक नंदकुमार भंडारी करत आहेत.

हा ऐवज नेला चोरून…
सोन्याची साखळी किंमत ६० हजार रुपये
सोन्याच्या ६ बांगड्या किंमत २ लाख ८० हजार
सोन्याची अंगठी किंमत २० हजार रुपये
कानातील २ रिंगा किंमत २० हजार
रोख रक्‍कम ५ हजार रुपये
मोबाइल किंमत २ हजार रुपये
एकूण किंमत ३ लाख ८७ हजार रुपये