लिव्ह इनमध्ये राहणाऱ्या प्रियकराने प्रेयसीचे ४ वर्षे केले लैंगिक शोषण!, हर्सूल परिसरातील घटना

छत्रपती संभाजीनगर (सीएससीएन वृत्तसेवा) : युवतीसोबत लिव्ह इन रिलेशनशीपमध्ये राहून युवकाने चार वर्षे शारीरिक संबंध ठेवले. लग्नाचे आमिष तो दाखवत होता. आता मात्र तो उलटला असून तिला शिवीगाळ करून बेदम मारहाण केली. जीवे मारण्याची धमकी दिली. फसवणूक झाल्याचे लक्षात आल्याने युवतीने हर्सूल पोलीस ठाण्यात तक्रार दिली.

सदानंद एकनाथ सोसे (वय ३१, रा. मलकापूर झोटिंगा, दुसरबीडजवळ, जि. बुलडाणा) असे संशयिताचे नाव आहे. पीडित युवती आणि सदानंद २०२० ते एप्रिल २०२४ या काळात हर्सूलच्या पिसादेवी रोड परिसरातील अंबिकानगरात लिव्ह इन रिलेशनशीपमध्ये राहत होते. या काळात दोघांत वारंवार शारीरिक संबंध प्रस्थापित झाले. सदानंद वाळू सप्लायरचे काम करतो. चार वर्षांपूर्वी युवतीची त्‍याच्याशी ओळख झाली होती.

तेव्हापासून दोघेही एकत्र राहत होते. सदानंदने तिला माझे तुझ्यावर खूप प्रेम आहे. तुझ्याशी लग्न करेल असे आमिष दाखवून तिचा वारंवार उपभोग घेतला. त्यानंतर युवतीने लग्नासाठी तगादा लावला. त्‍यामुळे सदानंद याच्यासह एक महिला आणि प्रल्हाद जायभाय (दोघेही रा. जाधवमंडी) यांनी तिला शिवीगाळ करून बेदम मारहाण केली. हाताची नस कापून तुला जीवे मारू, अशी धमकी दिली. त्‍यामुळे युवतीने हर्सूल पोलीस ठाण्यात तक्रार दिली. पोलिसांनी सदानंदसह महिला व प्रल्हाद जायभाय अशा तिघांविरुद्ध गुन्हा दाखल केला आहे.

वकिलाकडून महिलेचा विनयभंग
वकिलाने त्याच्या न्यायालयातील दालनात महिलेचा विनयभंग केल्याची १६ जुलै रोजी दुपारी साडेबाराच्या सुमारास जिल्हा व सत्र न्यायालयात घडली. अब्दुल वकील महसूलदार असे संशयित वकिलाचे नाव आहे. तक्रारदार महिला ही दिवाणी दावा असलेल्या सुनावणीसाठी न्यायालयात गेली होती. तेव्हा अब्दुलने तिचा दालनात हात धरून विनयभंग केल्याचे तक्रारीत म्‍हटले आहे. याप्रकरणी वेदांत नगर पोलीस ठाण्यात गुन्हा दाखल करण्यात आला आहे.