छत्रपती संभाजीनगर (सीएससीएन वृत्तसेवा) : शंभुनगरात २ ऑगस्टला ३६ वर्षीय महिलेने गळफास घेऊन आत्महत्या केली होती. जवाहरनगर पोलीस ठाण्यात आता महिलेच्या भावाने तक्रार दिल्यानंतर तिच्या आत्महत्येच्या कारणाचा उलगडा झाला आहे. एका युवकासोबत पाच महिने लिव्ह इन रिलेशनशीपमध्ये राहिल्यानंतर त्याने लग्नाला नकार दिला व मानसिक छळ करू लागल्याने महिलेने टोकाचे पाऊल उचलल्याचे समोर आले आहे.
रफीक निजाम शेख (रा. हिनानगर, चिकलठाणा) असे संशयिताचे नाव असून त्याच्याविरुद्ध जवाहरनगर पोलिसांनी गुन्हा दाखल केला आहे. याप्रकरणी फेरोजखान मनवरखान पठाण (वय ३४, रा. पैठणगेट) यांनी तक्रार दिली. तक्रारीनुसार, पठाण यांची बहीण सुमय्या हुसैन शेख (३६) हिची रफीकसोबत ओळख झाली होती. ओळखीतून त्याने सुमय्याकडून ७० हजार रुपये घेतले होते. तुझ्यासोबत लग्न करतो, असे आमिष दाखवून त्याने तिच्यासोबत राहायला सुरुवात केली. दोघे पाच महिने सोबत राहत होते. यानंतर मात्र रफीकने लग्नाला नकार देत तिचा मानसिक छळ करणे सुरू केला. या छळाला कंटाळून सुमय्याने २ ऑगस्टला घरात गळफास घेऊन आत्महत्या केली होती.
अल्पवयीन मुलीचे फोटो केले व्हायरल…
बी.एस्सी.च्या प्रथम वर्षात शिकणाऱ्या अल्पवयीन तरुणीचे इन्स्टाग्रामवर फेक अकाउंट बनवून तिचे मित्रासोबतचे फोटो व्हायरल केल्याची घटना वाळूज एमआयडीसीत समोर आली आहे. घरी येऊन तिच्या कुटुंबीयांना जीवे मारण्याची धमकीही तरुणाने दिली. वाळूज एमआयडीसी पोलिसांनी तरुणाविरुद्ध गुन्हा दाखल केला आहे. मच्छिंद्र संतोष लेनवार असे संशयित तरुणाचे नाव आहे. तो आणि तरुणी शेजारी शेजारी राहतात. ती घरात एकटी असताना मच्छिंद्र हा तीन मित्रांसोबत तिच्या घरी आला. त्याने तिचे रवी जाधवसोबतचे कॉफी शॉपमध्ये काढलेले फोटो दाखवून ब्लॅकमेल केल्याचे तक्रारीत म्हटले आहे.
१२ वर्षीय मुलीचा विनयभंग
रंजित माणिकराव भोसले (वय ३८, रा. बारामती, जि. पुणे) याने १२ वर्षीय मुलीचा विनयभंग केल्याची घटना ११ ऑगस्ट रोजी सकाळी साडेसहाच्या सुमारास पुंडलिकनगर भागात घडली. रंजितविरुद्ध पुंडलिकनगर पोलिसांनी गुन्हा दाखल केला आहे.
.jpeg)
.jpg)
