दोघींच्या सोनसाखळ्या गेल्या…छत्रपती संभाजीनगरात मंगळसूत्रचोरांचा हैदोस

छत्रपती संभाजीनगर (सीएससीएन वृत्तसेवा) : छत्रपती संभाजीनगरात मंगळसूत्र चोरांनी अक्षरशः हैदोस घातला असून एकटीदुकट्यांना महिलांना टार्गेट केले जात आहे. त्‍यामुळे महिलांमध्ये भयाचे वातावरण निर्माण झाले आहे. आताही दोन महिलांच्या सोनसाखळ्या चोरांनी गायब केल्याच्या घटना समोर आल्या आहेत.

मंदिरात दर्शन करून घरी परतणाऱ्या ७४ वर्षीय शालिनी अविनाश कुलकर्णी (रा. सिडको एन ५, साहस सोसायटी) या शुक्रवारी (१६ ऑगस्ट) सकाळी साडेसातला गणपती मंदिरात गेल्या होत्या. आरती आटोपून पायी घराकडे परतत असताना साहस सोसायटीसमोर समोरून आलेल्या दोन दुचाकीस्वारांपैकी मागे बसलेल्याने त्यांच्या गळ्यातील १५ ग्रॅमची सोनसाखळी हिसकावली आणि दोघे दुचाकीवरून वेगाने पसार झाले. कुलकर्णी यांनी आरडाओरड केल्याने धावून आलेल्या नागरिकांनी चोरट्यांचा पाठलाग केला. मात्र, ते मिळून आले नाहीत. कुलकर्णी यांनी पुंडलिकनगर पोलिसांत तक्रार दिली. त्‍यावरून चोरट्यांविरुद्ध गुन्हा दाखल करण्यात आला आहे. अधिक तपास पोलीस उपनिरीक्षक सुनील म्हस्के करत आहेत.

दुसऱ्या घटनेत सुरेखा गायकवाड (४२, रा. जयभवानीनगर) यांनी १५ ऑगस्ट रोजी सायंकाळी आकाशवाणी येथून ५ ग्रॅमची सोनसाखळी खरेदी केली. तेथून त्या मुलीसह पुंडलिकनगर रोडवरील घरी येत असताना पाणीपुरी खाण्यासाठी थांबल्या. काही वेळाने त्यांचे पती तेथे आले. त्यांना दाखवण्यासाठी त्यांनी पर्समधून सोनसाखळीचा बॉक्स काढला असता त्यात सोनसाखळीच नसल्याचे पाहून धक्काच बसला. पाणीपुरी खाताना चोरांनी नजर चुकवून चोरी केल्याचा संशय त्‍यांनी व्यक्‍त केला आहे.