पहिल्या नवऱ्याशी काडीमोड न घेता तरुणीने केटरिंग व्यावसायिकाशी थाटला संसार!; नंतर घर व पैशांसाठी ब्‍लॅकमेल!!, हडकोतील घटना, तरुणीसह तिच्या आई, वडील, भावाविरुद्ध गुन्हा दाखल

छत्रपती संभाजीनगर (सीएससीएन वृत्तसेवा) : पहिल्या पतीपासून घटस्‍फोट न घेता तरुणीने छत्रपती संभाजीनगर शहरातील केटरिंग व्यावसायिकासोबत गंधर्व विवाह केला. त्‍यानंतर घर नावावर करून द्या, खात्‍यात ५ लाख रुपये टाका, असे म्‍हणून ब्लॅकमेल सुरू केले. सिडको पोलिसांनी तरुणीसह तिच्या आई, वडील व भावाविरुद्ध गुन्हा दाखल केला आहे.

सचिन पांडुरंग कांबळे (वय ४०, स्वामी विवेकानंदनगर, हडको एन १२, छत्रपती संभाजीनगर) यांनी या प्रकरणात तक्रार दिली आहे. ते केटरिंगचे काम करतात. ते वडिलांसह राहतात. त्‍यांचे पहिले लग्न १६ वर्षांपूर्वी नारेगावच्या तरुणीसोबत झाले होते. घरगुती कारणावरून त्‍यांचा घटस्फोट झाला होता. त्यानंतर पाहुण्यांमधील सरला साठे हिचे सुध्दा पहिले लग्न झालेले असल्याने व तिचासुध्दा घटस्फोट झाल्याचे सांगितल्याने ११ जून २०१४ रोजी त्‍यांनी सरला उर्फ सविता साठे (रा. दुधना काळेगाव ता. जि. जालना) हिच्यासोबत दुसरे लग्न केले.

लग्नानंतर सन २०१६ मध्ये त्‍यांना १ मुलगा झाला. त्यानंतर सरला तिच्या माहेरी मुलासह निघून गेली. ती सहा महिने झाले तरी येत नसल्याने तिला घेण्यासाठी सचिन दुधना काळेगाव येथे तिच्‍या माहेरी गेले असता सरला त्‍यांना म्हणाली, की आधी तुमचे राहते घर माझ्या नावावर करा. तसेच माझे खात्यावर पाच लाख रुपये टाका. तरच मी तुमच्यासोबत नांदायला येते. त्यानंतर सचिन परत तिला वारंवार घेण्यासाठी माहेरी गेले असता तिने सोबत येण्याचे टाळले. पत्नी सरला, सासरे दिनकर रामभाऊ साठे, सासू रुखमणबाई दिनकर साठे, साला विक्रम दिनकर साठे सर्व (रा. दुधना काळेगाव झोपडपट्टी ता. जि. जालना) हे सचिनला शिवीगाळ करायचे. तू जर सरलाच्या नावावर घर केले नाही व तिच्या खात्यावर पैसे दिले नाहीतर तुला जीवे मारून टाकू, अशी धमकी द्यायचे.

सचिनविरुद्धच केला होता गुन्हा दाखल
सन २०१९ मध्ये सरलाने सचिन व त्‍याच्‍या कुटुंबीयांविरुद्ध गुन्हा दाखल केला होता. या गुन्ह्याचा निकाल सचिनच्या बाजूने लागल्यानंतर सरला पुन्हा सचिनशी चांगली बोलू लागली. मात्र सोबत राहण्यासाठी छत्रपती संभाजीनगरला आली नाही. ती सचिनशी चांगली बोलत असल्याने तो परत तिला घेण्यासाठी गेला असता ती पुन्हा त्याच पध्दतीने त्याच्याशी वागू लागली. सचिनने तिला विचारले, की तुझे पहिल्या नवऱ्यासोबत झालेल्या घटस्फोटाची कागदपत्रे कोठे आहे. त्यावेळेस ती कागदपत्रे दाखवण्यास टाळाटाळ करू लागली.

…अन्‌ घटस्‍फोट झालाच नव्हता!
सचिनला संशय आल्याने त्‍याने नातेवाईकांत विचारपूस केली असता तिच्या नवऱ्याचे नाव समजले. तिचा पहिल्या नवऱ्यासोबत घटस्फोट झाला नाही हेही समजले. ई कोर्ट या ॲपवर सुद्धा तिच्या पहिल्या नवऱ्याचे नाव टाकून चेक केले असता तिची डिव्होर्स केस आणखीही कोर्टात चालू आहे, असे सचिनला कळले. सरला हिने तिचे पहिले लग्न झालेले असतानाही घटस्फोट न घेता सचिनशी लग्न (गंधर्व) करून फसवणूक केली. त्‍यामुळे सचिनने पत्नी सरला व तिचे आई, वडील, भाऊ यांच्‍याविरुद्ध सिडको पोलीस ठाण्यात तक्रार दिली. त्‍यावरून पोलिसांनी गुन्हा दाखल केला आहे. अधिक तपास पोलीस अंमलदार येडूबा तेलुरे करत आहेत.