जळगाव /यवतमाळ (सीएससीएन न्यूजडेस्क) : दोन सामूहिक बलात्‍कारांच्या घटनांनी महाराष्ट्र हादरला आहे. एक घटना जळगाव जिल्ह्यातील असून, ३५ वर्षीय महिलेला घरी सोडतो म्‍हणून दुचाकीवर बसवत जंगलात नेत तिघांनी बलात्‍कार केला. दुसऱ्या घटनेत यवतमाळ जिल्ह्यात एका अल्पवयीन मुलीचे पाच मित्रांनी लचके तोडले.
नागपूर येथून बेपत्ता झालेल्या एका अल्पवयीन मुलीवर यवतमाळमध्ये वारंवार सामूहिक अत्याचार झाला. पोलिसांनी यवतमाळातील तिघांना व नागपुरातील दोन तरुणांना अटक केली आहे. आरोपींमध्ये आणखी वाढ होण्याची शक्यता आहे. नागपूर येथील हुडकेश्वर पोलीस ठाण्यात अल्पवयीन मुलगी बेपत्ता झाल्याची तक्रार दाखल झाली होती. या प्रकरणात चौकशी सुरू असतानाच वाहतूक शाखेतील जमादार जितेंद्र खोब्रागडे यांना यवतमाळ येथील सेवानगर येथे एका मुलीला काही मुलांनी खोलीवर ठेवल्याची माहिती मिळाली.
त्यावरून यवतमाळ शहर पोलिसांनी खोलीवर छापा मारून मुलीची सुटका केली. तिला १७ जुलै रोजी हुडकेश्वर पोलिसांच्या ताब्यात दिले. अल्पवयीन मुलीला १६ जुलै रोजी नागपूर येथून यवतमाळात आणले गेले. त्यानंतर तिला यवतमाळातील सेवानगर भागात एका खोलीत ठेवण्यात आले. तिला गुंगीच्या गोळ्या देऊन पाचही तरुण वारंवार बलात्‍कार करत होते. नागपुरातील दोन तरुणांना अटक केली. त्यानंतर त्यांच्या संपर्कातील यवतमाळच्या सेवानगर परिसरातील तिघांना अटक केली.
जळगावच्या घटनेत दोघांना अटकजळगाव जिल्ह्यातील भुसावळ तालुक्यातील खेडी रोडवर रविवारी (२० जुलै) रात्री आठच्या सुमारास ३५ वर्षीय महिलेवर तिघांनी सामूहिक बलात्‍कार केला. घरी सोडतो असे सांगून दुचाकीवर तिला बसवले होते. जंगलात नेऊन तिघांनी तिचे लचके तोडले. भुसावळ बाजारपेठ पोलिसांनी तिघांविरुद्ध गुन्हा दाखल केला असून, दोघांना अटक केली आहे. तिसरा आरोपी फरारी आहे. महिलेच्या तक्रारीनुसार, ती लहान मुलासह रात्रीच्या सुमारास खेडी रोडने जात होती. दशरथ गोरेलाल भिलाले, कुंदन गोरेलाल भिलाले आणि शंकर भगवानसिंग भिलाले (तिघेही रा. भुसावळ) यांनी तिला घरी सोडण्याचा बहाणा करत दुचाकीवर बसवले. जवळच्या जंगलात तिला नेत तिघांनी आळीपाळीने बलात्‍कार केला. महिलेने भुसावळ बाजारपेठ पोलीस ठाणे गाठून तक्रार दाखल केली. अल्पवयीन मुलीसोबत यवतमाळच्या तरुणांची इन्स्टाग्रामवरून ओळख झाली होती. तिला नागपुरातून यवतमाळात आणणारे कोण आहेत याचाही तपास आता पोलीस करीत आहेत. गुंगीच्या गोळ्या देऊन मुलीला मादनी शिवारातील एका शेतात नेऊन तिथेही तिच्यावर पाच जणांनी अत्याचार केला. यामध्ये शेतातील चौकीदारही सहभागी असल्याचे समजते. हे शेत नेमके कोणाचे आहे, चौकीदार कोण याचा शोध पोलिसांकडून घेतला जात आहे.
.jpg)
