मुंबई (मेट्रोपोलिस पोस्ट वृत्तसेवा) : राज्यातील नगरपरिषदा आणि नगरपंचायतींचा निवडणूक कार्यक्रम अखेर आज, ४ नोव्हेंबरला राज्य निवडणूक आयोगाने जाहीर केला असून, २४६ नगर परिषदा आणि ४२ नगरपंचायतींच्या निवडणुकीत २ डिसेंबरला मतदान तर ३ डिसेंबरला मतमोजणी होईल.
राज्य निडणूक आयोगाचे आयुक्त दिनेश वाघमारे, सचिव सुरेश काकाने, उपसचिव सुर्यकृष्ण मूर्ती, उपायुक्त राजेंद्र पाटील यांनी आज दुपारी चारला पत्रकार परिषद घेतली. राज्य निवडणूक आयुक्त वाघमारे यांनी पत्रकारांना सांगितले, की नगर परिषदा आणि नगरपंचायतींच्या निवडणुकीसाठी १० नोव्हेंबरपासून उमेदवारी अर्ज स्वीकारणे सुरू होईल. अर्ज भरण्याची अखेरची मुदत १७ नोव्हेंबर असेल. २६ नोव्हेंबर रोजी अंतिम उमेदवार यादी जाहीर होईल. याच दिवशी उमेदवारांना निवडणूक चिन्हांचे वाटपही केले जाईल. सर्वोच्च न्यायालयाने ३१ जानेवारी २०२६ पूर्वी स्थानिक स्वराज्य संस्थांच्या निवडणुका घेण्याचे निर्देश दिल्याचा उल्लेख वाघमारे यांनी या वेळी केला.
एकूण ८६ हजार ८५९ सदस्य आणि २८८ अध्यक्षांची निवड या निवडणुकीतून होणार आहे. २४६ नगरपरिषदांमध्ये १० नगरपरिषदांची निवडणूक पहिल्यांदाच होत आहे. २३६ नगरपरिषदांची मुदत यापूर्वीच संपलेली आहे, असे त्यांनी सांगितले. एकूण १४७ नगरपंचायती असून, ४२ नगरपंचायतींसाठी निवडणूक होईल. त्यात १५ नव्या नगरपंचायती आहेत. २६ नगरपंचायतींची मुदत यापूर्वीच संपलेली आहे. उर्वरित १०५ नगरपंतायतींची मुदत संपलेली नाही, असे वाघमारे यांनी सांगितले.
उमेदवारी अर्ज भरताना...उमेदवारी अर्ज भरण्यासाठी निवडणूक आयोगाने संकेतस्थळ सुरू केले असून, तिथे अर्ज स्वीकारले जातील. एका प्रभागात एका उमेदवाराला जास्तीत जास्त चार नामनिर्देशन पत्र दाखल करता येतील. सोबत जात वैधता प्रमाणपत्रदेखील आवश्यक असेल. ज्यांनी जात वैधता प्रमाणपत्रासाठी अर्ज केला आहे त्यांना अर्ज केल्याची पावती जमा करावी. मात्र असा उमेदवार निवडून आला तरी त्याला निवडून आल्यानंतर सहा महिन्यांत जात वैधता प्रमाणपत्र देणे आवश्यक असणार आहे.
खर्चाचं काय?
उमेदवारांसाठी खर्च मर्यादा वाढवली असून, अ वर्ग नगर परिषदेसाठी सदस्य पदासाठी ५ लाख, तर अध्यक्ष पदासाठी १५ लाख, ब वर्गासाठी अध्यक्षपदासाठी ११ लाख २५ हजार तर सदस्य पदासाठी ३ लाख ५० हजार, क वर्गासाठी अध्यक्ष पदासाठी ७ लाख ५० हजार आणि सदस्य पदासाठी २ लाख ५० हजार. नगरपंचायतीसाठी अध्यक्ष पदासाठी ६ लाख आणि सदस्य पदासाठी २ लाख २५ हजार अशी खर्चाची मर्यादा राहणार आहे.
असे होईल मतदान...
नगरपरिषदेची सदस्य संख्या सामान्यतः २० ते ७५ अशी आहे. नगरपंचायतीची सदस्यसंख्या १७ आहे. नगरपरिषदेची निवडणूक बहुसदस्यीय पद्धतीनुसार आहे. एका प्रभागात सर्वसाधारणपणे २ जागा असतात. पण नगरपरिषदेचा सदस्यसंख्येचा आकडा विषम असेल तर तिथे ३ जागा असतात. म्हणजे साधारणतः मतदारांना २-३ सदस्यांसाठी मतदान करावे लागेल. नगर पंचायतीमध्ये एक सदस्य आणि एक अध्यक्ष असतो. त्यामुळे तिथे मतदारांना २ मते द्यावी लागतील. निवडणुका इलेक्ट्रॉनिक मशीन आणि बॅलेट युनिट वापरण्यात येतील.
.jpg)
.jpg)
.jpg)
