छत्रपती संभाजीनगर (मेट्रोपोलिस पोस्ट वृत्तसेवा) : जिल्ह्यातील ज्येष्ठ समाजसेवक रमेश अण्णा मुळे यांच्या सामाजिक कार्याची दखल राष्ट्रीय पातळीवर घेण्यात आली. दिल्लीत माजी पंतप्रधान भारतरत्न अटलबिहारी वाजपेयी यांच्या शतकोत्तर जन्मजयंतीनिमित्त ३ जानेवारीला आयोजित विशेष कार्यक्रमात श्री. मुळे यांचा सन्मान करण्यात आला.
कार्यक्रमाला केंद्रीय रेल्वे, माहिती व प्रसारण मंत्री अश्विनी वैष्णव यांची प्रमुख उपस्थिती होती. कार्यक्रमाच्या अध्यक्षस्थानी राष्ट्रीय स्वयंसेवक संघाचे राष्ट्रीय कार्यकारिणी सदस्य इंद्रेश कुमार होते. या वेळी छत्रपती संभाजीनगर, बुलडाणा जिल्ह्यात ज्येष्ठ समाजसेवक रमेश अण्णा मुळे यांनी समाजहितासाठी केलेल्या उल्लेखनीय कार्याची दखल घेत केंद्रीय मंत्री अश्विनी वैष्णव यांच्या हस्ते त्यांचा सन्मान करण्यात आला. ग्रामीण भागातील सामाजिक प्रश्न, जनजागृती, सेवाभावी उपक्रमांसाठी मुळे यांनी केलेल्या कार्याचे उपस्थित मान्यवरांनी विशेष कौतुक केले. या वेळी मदरलँड इंटरनॅशनल फाउंडेशनचे अध्यक्ष डॉ. ए. के. अग्रवाल, राष्ट्रीय अल्पसंख्याक शिक्षण आयोगाचे अध्यक्ष डॉ. शाहीद अख्तर, मोनिका कलहर भारद्वाज, सुरेश चव्हाणके, डॉ. श्रीराम जोशी, राजकुमार शर्मा, आनंद रेखी, राजेश यादव, सुभाष लोखंडे आदी मान्यवर उपस्थित होते. दिल्लीतील या गौरवामुळे छत्रपती संभाजीनगर, बुलडाणा जिल्ह्याच्या सामाजिक क्षेत्राचा नावलौकिक राष्ट्रीय स्तरावर वाढला आहे.
कोण आहेत रमेश अण्णा मुळे?जेष्ठ समाजसेवक रमेश अण्णा मुळे हे मुळे अण्णा सोशल फाउंडेशनचे अध्यक्ष असून, २० वर्षांपासून अनेक उपक्रम राबवत आहेत. मराठवाडा व विदर्भामध्ये लाखो रुग्णांना आरोग्य सेवेचा लाभ देतात व गरीब कुटुंबांना अन्नधान्य ओषधोपचार व आर्थिक मदत वेळोवेळी करतात. कोरोनाच्या संकट काळात लोकांना जीवन जगण्यासाठी व कोरोनाग्रस्त रुग्णांचे जीवन वाचवण्यासाठी त्यांनी काम केलेले आहे. अनेक मंदिर, शाळा, कौशलविकास केंद्रे, आश्रम, रुग्णालये यांच्या पायभरणीत व उभारणीत अण्णांचे योगदान आहे. महानुभाव पंथ, वारकरी संप्रदाय, राष्ट्रीय सेवक संघ, इतर समाजसेवी संस्थांसोबतही सेवाव्रत आहेत. गरजवंत गरिबांचे लग्नकार्ये, रुग्णांचे किडनी प्रत्यारोपण सेवा, आरोग्य सेवा, शिक्षण सेवा, पोलीस मित्र सेवा त्यांच्या फाउंडेशनच्या माध्यमातून सेवेत निरंतर कार्यरत आहेत. महाराष्ट्र शासनाच्या अनेक सेवाभावी उपक्रमात सहभागी होत असतात.
