छत्रपती संभाजीनगर (मेट्रोपोलिस पोस्ट वृत्तसेवा) : निष्ठावंतांना डावलल्याचे पडसाद दोन दिवस भाजप प्रचार कार्यालयासमोर उमटले. मंत्री अतुल सावे, खा. डॉ. भागवत कराड यांच्यावर निष्ठावंतांनी संताप व्यक्त केला. विशेष म्हणजे, एकीकडे हा आक्रोश सुरू असताना दुसरीकडे एकाच कुटुंबातील दोघांना भाजपने उमेदवारी दिल्याचेही समोर आले आहे. प्रभाग १५ ब मधून जयश्री राजेश व्यास (ओबीसी महिला) तर प्रभाग १५ ड मधून मिथून सतीश व्यास (सर्वसाधारण) यांना भाजपने उमेदवारी दिली. जयश्री या मिथून यांच्या वहिणी आहेत.
एकाच कुटुंबातील दोघांना तिकीट दिल्याने पक्षाच्या ज्येष्ठ कार्यकर्त्यांनी नाराजी व्यक्त केली आहे. स्थानिक नेत्यांवर रोषही व्यक्त केला आहे. राजेश (पप्पू) व्यास यांचे वडील गुलाबचंद आणि मिथुन व्यास यांचे वडील सतीश व्यास हे दोघे सख्खे भाऊ आहेत. मूलचंद व्यास यांना ४ अपत्ये होती. गुलाबचंद आणि सतीश अशी २ मुले, तर कमलाबाई आणि गीताबाई अशा २ मुली. गुलाबचंद यांचा मुलगा म्हणजे पप्पू उर्फ राजेश व्यास, तर सतीश व्यास यांचा दुसऱ्या क्रमांकाचा मुलगा मिथुन व्यास आहेत. जयश्री व्यास यांची लढाई शिंदे गटाच्या उमेदवार प्राजक्ता राजपूत आणि ठाकरे गटाच्या उमेदवार सोनल जैस्वाल यांच्याशी होत आहे. तर मिथून यांच्याविरोधात शिंदे गटाचे ऋषिकेश जैस्वाल आणि ठाकरे गटाचे उमेदवार लक्ष्मीनारायण बाखरिया उभे ठाकले आहेत. या दोन्ही रोमांचक लढायांत कोण बाजी मारते, याकडे सर्वांचे लक्ष लागले आहे.
.jpg)
.jpeg)
