छत्रपती संभाजीनगर बाजार समितीच्या सभापतीपदी राम शेळके बिनविरोध, स्पर्धेत असलेले गणेश दहिहंडे म्हणाले...

छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगर उच्चतम कृषी उत्पन्न बाजार समितीच्या सभापतीपदी भाजपच्या राम शेळके यांची मंगळवारी (३० डिसेंबर) बिनविरोध निवड झाली. ते बाजार समितीचे १५ वे सभापती ठरले असून, अडीच वर्षांसाठी त्यांचा कार्यकाळ असेल. मात्र कदाचित शेवटचे सहा महिने ठरल्याप्रमाणे गणेश दहिहंडे यांना सभापती करण्याचा विचार झाला, तर शेळके हे दोनच वर्षे सभापती असतील.

राधाकिसन पठाडे यांनी सभापतीपदाचा राजीनामा दिल्यानंतर उर्वरित अडीच वर्षांसाठी कोण सभापती होणार, याची उत्सुकता होती. राजस्थानचे राज्यपाल हरिभाऊ बागडे यांनी राम शेळके यांच्या नावाला पसंती दर्शवली. बाजार समितीच्या कार्यालयात निवडणूक प्रक्रिया झाली. भाजपकडून राम शेळके यांनी अर्ज भरला, काँग्रेसकडूनही कुणीही अर्ज केला नाही. त्यामुळे निवड बिनविरोध झाली. निवडणूक अधिकाऱ्यांनी राम शेळके यांची सभापतीपदासाठी बिनविरोध निवड झाल्याची घोषणा केली. त्यानंतर कार्यालयाबाहेर समर्थकांनी गुलाल उधळत जल्लोष साजरा केला.

या वेळी माजी सभापती राधाकिसन पठाडे, उपसभापती मुरलीधर चौधरी, गणेश दहीहंडे, भालचंद्र ठोंबरे, पूनमचंद बमणे, अभिजीत देशमुख, दत्तात्रय उकिर्डे, सुजाता गायके, जनाबाई ठोंबरे, भागीनाथ नवपुते, कन्हैयालाल जैस्वाल, नीलेश सेठी, देविदास कीर्तिशाही, महेंद्र खोतकर, जगन्नाथ काळे, पठाण अब्दुल रहीम आदींची उपस्थिती होती. बाजार समितीत विकासकामे आणखी वेगाने करण्यात येतील. शेतकरी-व्यापारी आणि ग्राहकांच्या हिताच्या योजना राबविल्या जातील, अशी ग्वाही नवनिर्वाचित सभापतींनी दिली. राज्यपाल हरिभाऊ बागडे व सर्व संचालकांनी माझ्यावर विश्वास ठेवला. सार्थक करून दाखवेन, असे राम शेळके म्हणाले. दरम्यान, सभापतीपदाच्या शर्यतीत असलेले गणेश दहिहंडे म्हणाले, की काँग्रेसमधून मी भाजपात प्रवेश केला आणि बाजार समितीचा संचालक बनलो. आता २ वर्षे राम शेळके सभापती राहणार असून, शेवटचे ६ महिने मला सभापती करण्याचा शब्द हरिभाऊ बागडे यांनी दिल्याचे ते म्हणाले.