छत्रपती संभाजीनगर (दिव्या पुजारी : सीएससीएन वृत्तसेवा) : राज्यपाल सी. पी. राधाकृष्णन आज, १० सप्टेंबरला छत्रपती संभाजीनगरात होते. त्यांनी आपल्या दौऱ्यात विविध राजकीय पक्षांच्या प्रमुख नेत्यांशी जिल्ह्यासह मराठवाड्यातील विकासाच्या प्रश्नांवर चर्चा केली. विकास विषयक अपेक्षा व संकल्पना समजून घेतल्या.
सुभेदारी अतिथी गृहावर विविध राजकीय पक्षांचे नेते, लोकप्रतिनिधी, समाजातील विविध घटकांशी त्यांनी चर्चा केली. पालकमंत्री अब्दुल सत्तार, विधान परिषदेतील विरोधी पक्षनेते अंबादास दानवे, खासदार कल्याण काळे, खासदार संदिपान भुमरे, आमदार प्रशांत बंब, आ. रमेश बोरनारे, माजी खासदार इम्तियाज जलील यांची उपस्थिती होती. विभागीय आयुक्त दिलीप गावडे, जिल्हाधिकारी दिलीप स्वामी हेसुद्धा उपस्थित होते.
राज्यपालांच्या समोर मांडलेल्या विषयांत प्रामुख्याने पाण्याचे समन्यायी वाटप, समतोल विकास, वैधानिक विकास महामंडळाचे पुनरुज्जीवन यासारखे विषय मांडण्यात आले. उद्योग, पर्यटना वाढीसाठी पायाभूत सुविधांवरही खलबते झाली. मराठवाड्यातील परभणी, हिंगोली आणि बीड यांच्या विकासासाठी विशेषत्वाने उपाययोजना करण्याबाबतही विषय मांडण्यात आले. राज्यपाल राधाकृष्णन यांनी सर्व गटांचे म्हणणे ऐकून घेत सर्व मागण्या व विकास संकल्पनांबाबत लक्ष घालण्याचे आश्वासन दिले.
विमानतळावर असे झाले स्वागत…
राज्यपाल राधाकृष्णन यांचे आज दुपारी पावणे चारच्या सुमारास येथील विमानतळावर शासकीय विमानाने आगमन झाले. प्रशासनाच्या वतीने त्यांचे स्वागत करण्यात आले. राज्याचे पणन, अल्पसंख्याक विकास व औकाफ मंत्री तथा जिल्ह्याचे पालकमंत्री अब्दुल सत्तार, विधान परिषदेचे विरोधी पक्ष नेते अंबादास दानवे, विभागीय आयुक्त दिलीप गावडे, मनपा आयुक्त जी. श्रीकांत, जिल्हाधिकारी दिलीप स्वामी, जिल्हा परिषदेचे मुख्य कार्यकारी विकास मीना, डॉ. बाबासाहेब आंबेडकर मराठवाडा विद्यापीठाचे कुलगुरू डॉ. विजय फुलारी, छत्रपती संभाजीनगर परिक्षेत्राचे विशेष पोलीस महानिरीक्षक विरेंद्र मिश्र, पोलीस आयुक्त प्रवीण पवार, पोलीस अधीक्षक डॉ. विनयकुमार राठोड आदी उपस्थित होते.
.jpg)
.jpg)
