दोन्ही हातांनी ओढल्या १६ बुलेट!; धिप्पाड साडेसात फुटी सुखदेव सिंहांना पाहून छत्रपती संभाजीनगरकर म्हणाले, बाबोऽऽ इतका मोठा माणूस!!

छत्रपती संभाजीनगर (मेट्रोपोलिस पोस्ट वृत्तसेवा) : हिंद दी चादर श्री गुरू तेग बहादूर साहेब यांच्या शहीद दिनानिमित्त छत्रपती संभाजीनगर शहरातील सिंधी कॉलनीत शनिवारी (२२ नोव्‍हेंबर) सायंकाळी नगर कीर्तन झाले. यात सहभागी धिप्पाड अशा सुखदेव सिंह यांनी केलेल्या चित्तथरारक कसरतींनी सर्वांच्या हृदयाचा ठोका चुकवला. त्यांनी दोन्ही हातांनी चक्क १६ बुलेट ओढण्याचा विक्रम केला.

सिंधी कॉलनी येथील गुरुद्वारा येथून सायंकाळी सातला नगरकीर्तन निघाले. रात्री ९.३० ला ते धावणी मोहल्ला येथील गुरुद्वारा येथे पोहचले. ८०० शिख बांधवांनी सहभाग घेतला. पंचप्यारे अग्रस्थानी होते. मध्यभागी ग्रंथ ठेवला होता. भक्तिगीते गायली जात होती. पंचप्याऱ्यांमध्ये ७.५ फूट उंची आणि २१२ किलो वजन असलेले सुखदेव सिंह सर्वांचे लक्ष वेधून घेत होते. ते खास पंजाबहून छत्रपती संभाजीनगरला आले होते. यंदा दलेर खालसा इंटरनॅशनल ग्रुप पहिल्यांदाच नगरकीर्तनसाठी शहरात आला. ग्रुपमधील १५ सदस्यांनी चित्तथरारक प्रात्यक्षिके दाखवली.

श्री गुरु तेग बहादूर हे शीख धर्माचे नववे गुरू होते. त्यांचा जन्म अमृतसर (पंजाब) येथे झाला. त्यांनी आपल्या आयुष्यात अन्याय, धार्मिक असहिष्णुता आणि अत्याचाराविरोधात लढा दिला. त्यामुळेच त्यांना हिंद दी चादर या नावाने गौरविले जाते. धर्म, मानवता, आदर्श आणि तत्त्वांच्या रक्षणासाठी त्यांनी आपल्या प्राणांची आहुती दिली. त्यांचे जागतिक इतिहासात अद्वितीय स्थान आहे. धर्मरक्षणासाठी त्यांनी केलेल्या त्यागाला संपूर्ण शीख समाज उजाळा देत आहे. यानिमित्ताने ४ दिवसीय उत्सव छत्रपती संभाजीनगरात होत आहे.

आकर्षण ठरलेल्या सुखदेव सिंह यांची रोमांचक कहानी...
सर्वांचे आकर्षण ठरलेले सुखदेव सिंह खास पंजाबहून छत्रपती संभाजीनगरला आले होते. ते पंजाबमधील फतेहगढ साहिब येथील शेतकरी कुटुंबातील आहेत. त्यांच्या नावावर ६ आंतरराष्ट्रीय रेकॉर्ड आहेत. यात गिनीज, अमेरिकन, एशिया, यूएसए, इंडिया बुकचा समावेश आहे. एवढी मोठी शरीरयष्टी असूनही ते केवळ दोन पोळ्या खातात आणि रोज ६ लिटर दूध पितात. भारतातील ते सर्वाधिक उंचीचे व्यक्ती असल्याचे सांगितले जाते. भारतात साधारण व्यक्तीची उंची ५.८ फुटांपर्यंत असते. दी सन या ब्रिटिश वृत्तपत्राने काही काळापूर्वी सुखदेव सिंग यांच्यावर विशेष बातमी प्रसिद्ध केली होती. त्यातील उल्लेखानुसार, ते लहानपणापासूनच गर्दीत वेगळे दिसत होते. समवयस्कांच्या उंचीपेक्षा ते जास्त उंच होते. ते कपडे घेण्यासाठी दुकानात जाऊ शकत नाहीत. त्यांना ते शिंप्याकडूनच शिवून घ्यावे लागतात. त्यांना कपड्यांसाठी तब्बल ९ मीटर कापड लागते. ते बस किंवा कारमध्ये बसू शकत नाहीत.  त्यांना एका ठिकाणावरून दुसऱ्या ठिकाणी जाण्यासाठी मोटारसायकलचा वापर करावा लागतो. ती त्यांच्या तुलनेत खूपच छोटी दिसते. ते स्थानिक सेलिब्रिटी असून, त्यांच्यासोबत फोटो घेण्यासाठी लोक दूरदूरून येतात. जगात सर्वात उंच माणूस तुर्कीत असून त्याचे नाव सुलतान कोसेन आहे, जो ८ फूट ३ इंच उंच आहे. सुखदेव सिंह यांची काही छायाचित्रे पुढे पहा :