बेंगळुरूमध्ये विद्यार्थ्यांना फॅशन शिकवणारा गुलशन देवैया अभिनयाकडे वळला. हा मार्ग त्याच्यासाठी अजिबात सोपा नव्हता. दॅट गर्ल इन यलो बूट्स, शैतान, हंटर आणि मर्द को दर्द नही होता सारख्या चित्रपटांतील अभिनयामुळे कौतुक मिळवल्यानंतर तो "कांतारा: चॅप्टर वन’मध्ये दिसला. चित्रपटातील त्याच्या भूमिकेसाठी बरेच कौतुक झाले आहे. यानिमित्ताने त्याची खास मुलाखत...
कांतारा: चॅप्टर १ या चित्रपटाच्या अभूतपूर्व यशाबद्दल आणि त्याच्या भूमिकेच्या झालेल्या कौतुकाबद्दल गुलशन म्हणतो, की माझ्या कामाची नेहमीच प्रशंसा आणि कौतुक झाले आहे. परंतु मला आजवर इतका ब्लॉकबस्टर चित्रपट कधीच मिळाला नव्हता. यामुळे माझ्या कारकिर्दीसाठी भविष्यात उघडणारे दरवाजे महत्त्वपूर्ण असतील. आपल्या इंडस्ट्रीत, कोणाच्या चित्रपटाने किती कमाई केली हे नेहमीच महत्त्वाचे असते. मला वाटते की माझा रेटही आता वाढेल. मी सध्या हे यश एन्जॉय करत आहे.
आई-वडिलांची सेवा करणे माझे कर्तव्य!गुलशनला कला त्याच्या पालकांकडून वारशाने मिळाली. तो म्हणतो, की माझे पालक दोघेही कलाकार आहेत. मला त्यांच्याकडून संगीत, नाटक आणि चित्रकला वारशाने मिळाली. आज, ते माझ्या कामगिरीवर आनंदी आहेत. परंतु मला वाईट वाटते की ते कांतारा अध्याय एक पाहू शकले नाहीत. काही दिवसांपूर्वी, माझ्या वडिलांची कंबर एका रस्ते अपघातात मोडली आहे. ते बेंगळुरूमध्ये एका हिट-अँड-रनचे बळी ठरले. शस्त्रक्रियेदरम्यान आणि उपचारादरम्यान मी त्यांच्यासोबत होतो. माझ्या आईबद्दल बोलायचे झाले तर, ती थिएटरमध्ये जाऊ शकत नाही; ती अपंग आहे. ती बरेच काही करू शकत नाही. म्हणून मला तिला आंघोळ घालावी लागते आणि केस विंचरून द्यावे लागतात. ती अनेक वर्षांपासून आजारी आहे. ती माझा चित्रपट फक्त विशेष स्क्रीनिंगमध्ये किंवा ओटीटी प्लॅटफॉर्मवरच पाहू शकते. माझी आई १९८४ पासून आजारी आहे.
तिची रोगप्रतिकारक शक्ती नेहमीच कमी आहे. माझ्या आईची प्रकृती नेहमीच खराब असते. सुरुवातीला ती आजारी असतानाही ऑफिसला जायची. माझे वडील इतर गोष्टींची काळजी घेत असत. २०१९ पासून ती अंथरुणाला खिळलेली आहे. असे असूनही, २००८ मध्ये मी अभिनय करण्यासाठी घराबाहेर पडलो तेव्हा माझ्या पालकांपैकी कोणी एकदाही विचारले नाही की त्यांचे काय होईल. मला कोणीही थांबवले नाही. माझी आई ७७ वर्षांची आहे आणि माझे वडील ८९ वर्षांचे आहेत, तरीही माझी आई माझ्याकडून एकही रुपया घेत नाही. मी जेव्हा जेव्हा त्यांना पैसे देतो तेव्हा ते परत करतात. त्यांनी मला माझ्या इच्छा पूर्ण करण्यापासून कधीही रोखले नाही, म्हणून आज माझ्या पालकांची सेवा करणे माझे कर्तव्य आहे, असे गुलशनने सांगितले.
पालकही माझ्या फॅशन सेन्सवर प्रश्न करतात...
गुलशनला त्याच्या फॅशन सेन्समुळे ट्रोलिंगचा सामना करावा लागला आहे. तो म्हणतो, की मी लहानपणापासूनच फॅशनशी जोडलेला आहे. NIFT मधून फॅशन डिप्लोमा केल्यानंतर मी जवळजवळ आठ वर्षे बेंगळुरूमधील एका कॉलेजमधील विद्यार्थ्यांना फॅशन शिकवले. मी आठ वर्षे डिझायनर म्हणूनही काम केले. माझ्या ड्रेसिंगसाठी ट्रोल होण्याबाबत मला वाटते की फॅशन मजेदार असावी. मला फॅशनसोबत प्रयोग करायला आवडते. जर लोकांना ते आवडत नसेल तर ते ठीक आहे. ते नक्कीच टिप्पणी करू शकतात. कधीकधी माझे पालकही विचारतात, तू हे का घालतोस? ते चांगले दिसत नाही. पण मला ते आवडते. मी ते मजेसाठी करतो. मी स्वस्ताईसाठी, कोणालाही दुखावण्यासाठी किंवा कोणत्याही संस्कृतीची थट्टा करण्यासाठी फॅशन करत नाही.
माझा पहिला चित्रपट प्रदर्शित झाला नाही...
संघर्षाबद्दल गुलशन म्हणतो, की मला माझ्या संघर्षाबद्दल रडायचे नाही. कारण तो प्रवासाचा एक भाग आहे. मला नकार मिळाला, पण मला स्वीकृतीही मिळाली. मी कोणालाही माझा गॉडफादर मानत नाही. तुम्हाला स्वतःचा मार्ग शोधावा लागेल. माझ्या पहिल्या चित्रपट टीना की चाबीमध्ये मी फक्त तीन दिवस काम केले. त्या चित्रपटात माझे बरेच मित्र होते आणि दिग्दर्शकदेखील एक ओळखीचा होता. त्या चित्रपटाचा नायक रणवीर शौरी होता. तो चित्रपट प्रदर्शित झाला नाही. तांत्रिकदृष्ट्या माझा पहिला प्रदर्शित झालेला चित्रपट दॅट गर्ल इन यलो बूट्स होता. त्या चित्रपटानंतर माझ्या कारकिर्दीला वेग आला.
कंतारा : चॅप्टर वन मधील भूमिका मला नजरेसमोर ठेवून लिहिली गेली...
गुलशन सांगतो, की २०१९ मध्ये के. डी. सतीश चंद्रा यांनी माझी ऋषभ शेट्टीशी ओळख करून दिली. तेव्हाच मला समजले की त्याला त्याच्या कला आणि कामाबद्दल एक अनोखी आवड आहे. आम्ही एकत्र आणखी काही चित्रपटांची घोषणा केली होती, पण ते यशस्वी झाले नाहीत. मग एके दिवशी त्याने फोन केला आणि त्याच्या लेखन टीमसह मला सांगितले की तुला नजरेसमोर ठेवून एक भूमिका लिहिली गेली आहे. तथापि, चित्रीकरण सोपे नव्हते. हवामान भयानक होते आणि रस्ते किंवा पूल नव्हते. वाहने जाऊ शकत नसताना ऋषभ यांनी पूल बांधला. सर्व आव्हाने असूनही, कठीण परिस्थितीतही उत्कृष्टतेने चित्रपट पूर्ण करण्याची त्याची आवड अतुलनीय होती.
.jpg)
.jpeg)
