अभिनेत्री हुमा कुरेशीची विशेष मुलाखत : रडणे, तक्रार करण्याऐवजी नशीब स्वतःच्या हातात घेतले!

हिंदी चित्रपटसृष्टीत हुमा कुरेशीने आता आपले स्थान बळकट केले आहे. तिने तिच्या पहिला चित्रपट ‘गँग्स ऑफ वासेपूर’मध्येच अभिनयाची चमक दाखवली. त्यानंतर तिने ओटीटीवर "महाराणी’ बनून क्षमता सिद्ध केली. या शोचा चौथा सीझन लवकरच येत आहे. असे असूनही हुमा म्हणते, की तिला तिच्या प्रतिभेला न्याय देणाऱ्या मोठ्या किंवा चांगल्या संधी अजूनही मिळालेल्या नाहीत... तिची खास मुलाखत...

प्रश्न : या वर्षी, तू अभिनयाच्या पलीकडे एक पाऊल टाकले आणि चित्रपट निर्मितीत प्रवेश केला. निर्माती बनण्याचा विचार तुला कसा सुचला?
हुमा : निर्माती बनण्याचा विचार यामुळे आला, कारण ही इंडस्ट्री तुम्हाला जास्त संधी देत नाही. मी खूप काम केले आहे, तरीही मला अजूनही अनेक ठिकाणी नाकारले जाते किंवा मला हवे असलेले चित्रपट मिळत नाहीत. जर तुम्ही माझ्या फिल्मोग्राफीकडे पाहिले तर मला अशा चित्रपटांमुळे चाहत्यांचे प्रेम मिळाले आहे, जे चित्रपट इतर कोणीही करू इच्छित नव्हते. मला सर्वोत्तम संधी अजूनही मिळत नाहीत, की माझ्यासाठी मोठ्या बजेटचे चित्रपटही बनवले जात नाहीत. मी मला ज्या संधी मिळतात, त्यांचा पुरेपूर फायदा घेते. मात्र जेव्हा तुम्हाला वाटते की तुम्ही हे करू शकता, तरीही दुसरी व्यक्ती तुम्हाला ती संधी देत नाही. तेव्हा मला खूप वाईट वाटते. म्हणून मी विचार केला की रडण्याऐवजी आणि तक्रार करण्याऐवजी आपले नशीब स्वतःच्या हातात घेणे आणि आपल्याला हवे असलेले चित्रपट बनवणे चांगले. म्हणून, साकिब (अभिनेता भाऊ साकिब सलीम) आणि मी एकत्र येऊन ही कंपनी सुरू केली. आम्ही चित्रपट बनवत राहू आणि प्रत्येकाकडून काहीतरी शिकू.

प्रश्न : आजकाल इंस्टाग्रामच्या अल्गोरिथमवर आधारित चित्रपट बनवले जात आहेत. अशा गोष्टी तुम्हाला एक सर्जनशील व्यक्ती म्हणून खटकतात का?
हुमा : अल्गोरिथमवर आधारित चित्रपट बनवू नयेत. ही एक्सेल शीट नाही, जिथे तुम्ही दोन आणि दोन जोडून चार बनवता. ही एक क्रिएटिव प्रोसेस आहे. इथे कोणती गोष्ट कशी बनेल, हे तुम्ही सांगू शकत नाही. त्यामुळे चित्रपट निर्मितीमध्ये अशी गणिते लागू करणे मूर्खपणाचे आहे. जर एखादी गोष्ट हिट झाली तर तुम्ही त्याची शंभर कारणे सांगू शकता, परंतु जर तुम्ही त्या कारणांवर आधारित चित्रपट बनवला तर तुमच्यापेक्षा मूर्ख कोणीही नाही.

प्रश्न : तू यशसोबत "टॉक्सिक’ या दक्षिण भारतीय चित्रपटातही काम करत आहेस. तुला काय वाटतं दक्षिण भारतीय चित्रपट निर्माते योग्य काम करत आहेत, ज्यातून बॉलिवूडने काही शिकायला हवं?
हुमा : दाक्षिणात्य चित्रपट निर्माते हे त्यांच्या मुळाशी रुजलेल्या कथा सादर करतात. ते त्यांच्या लोकांच्या कहाण्या सांगतात. पाश्चिमात्य देशांपासून प्रभावित होऊन ते चित्रपट बनवत नाहीत. त्यामुळे त्यांचे चित्रपट अस्सल वाटतात. आपल्याकडे सर्व काही असतानाही आपल्याला माहित नाही की आपला प्रेक्षक कोण आहे.

प्रश्न : तुझा नवीन चित्रपट "सिंगल सलमा’ हा मुलींवर लग्न करण्यासाठी किती दबाव आहे हे दाखवतो. लग्नाबद्दल कोणी तुला कधी सल्ला दिला आहे का, की तुझे लग्नाचे वय होऊन चालले आहे असं...
हुमा : पर्सनली तर मला असं कुणी बोललं नाही. पण आपल्या समाजात मुलींवर लग्न करण्याचा नेहमीच दबाव असतो. २५ वर्षांनंतर लग्न कधी होईल? हा एक मोठा मुद्दा आहे. तुम्ही दुधाच्या डब्यासारखे किंवा फळासारखे आहात जे लवकर विकले नाही तर ते शिळे होईल आणि फेकून द्यावे लागेल. आपण मुलींना ओझ्यासारखे, वस्तूसारखे वागवणे थांबवले पाहिजे. दबावाखाली लग्न होऊ नये.

प्रश्न : तू तुझी सिंगल स्टेटस सोडून लवकरच लग्न करणार आहेस अशी चर्चा आहे?
हुमा : तुम्ही सिंगल आणि मिंगल हे दोन्ही सुंदरपणे एकत्र केले आहेत. पण मी माझ्या वैयक्तिक आयुष्याबद्दलच्या प्रश्नांची उत्तरे देऊ इच्छित नाही. ते माझे वैयक्तिक आयुष्य आहे, म्हणून ते खासगी आणि वैयक्तिक ठेवूया.

प्रश्न : तू दिल्ली क्राइम ३ या वेब सिरीजमध्ये ‘बडी दीदी’ची नकारात्मक भूमिका साकारली आहेस. ती नकारात्मकता स्वतःवर आणणे किती कठीण होते?
हुमा : खूप कठीण होते. प्रथम, नकारात्मक भूमिका साकारण्याची ही माझी पहिलीच वेळ आहे. ते पात्र खूप वाईट आहे, म्हणून ते साकारताना मी स्वतःशी खूप संघर्ष केला. मी मुलींच्या सक्षमीकरणावर विश्वास ठेवते आणि हा मुलींच्या तस्करीचा मुद्दा आहे. कलाकार म्हणून त्यावर प्रकाश टाकणे ही आपली जबाबदारी आहे. म्हणून, जर हुमा कुरेशीच्या या पात्राच्या साकारण्याने हा मुद्दा किंवा शो मोठा झाला आणि चर्चा सुरू झाली तर मला ते करायला आनंद होईल.

प्रश्न : तुम्हाला मुळात तुमच्या "झेबा: अ‍ॅन अ‍ॅक्सिडेंटल सुपरहिरो’ या कादंबरीच्या कथेवर आधारित चित्रपट बनवायचा होता. तुमची अजूनही ती इच्छा आहे का?
हुमा : मी त्यावर नक्कीच एक चित्रपट बनवेन. मी त्याची निर्मिती करेन, त्यात अभिनय करेन आणि मी तो नक्कीच बनवेन.
प्रश्न : "महाराणी’, "तरला’, "डबल एक्सेल’ किंवा अलीकडील "सिंगल सलमा’ तुझे सर्व प्रोजेक्ट मुलींशी संबंधित महत्त्वाचे मुद्दे उपस्थित करतात...
हुमा : मी भारतातील मुली आणि महिलांसाठी कथा बनवत आहे. मला ऑल गर्ल सुपरस्टार बनायचे आहे. ते माझे स्वप्न आहे. मला आमच्या (मुलींच्या) कथा, आमच्या समस्या, आमच्या गोष्टींबद्दल लोकांना सांगायचे आहे. जे इतर करत नाहीत.

प्रश्न : तुम्ही गेल्या पाच वर्षांपासून "राणी भारती’ म्हणून जगत आहात. या शोने तुमच्या आयुष्यात आणि कारकिर्दीत कोणते योगदान दिले आहे असे तुम्हाला वाटते?
हुमा : "राणी भारती’ ही अशी भूमिका आहे ज्याने माझे जीवन बदलले. या भूमिकेसाठी मला चाहत्यांचे खूप प्रेम मिळाले. असे प्रेम खूप कमी कलाकारांनी पाहिले आहे. त्याचा चौथा सीझन येत आहे, जो स्वतःच एक मोठी उपलब्धी आहे, कारण २०२१ मध्ये आम्ही सुरुवात केली तेव्हा फारसे लोक आमच्यावर विश्वास ठेवत नव्हते. वैयक्तिक पातळीवर, राणी भारतीने मला अधिक मजबूत आणि अधिक बोलके बनवले आहे.