आज वाढदिवस : ऐश्वर्या रायने नववीत असतानाच सुरू केले मॉडेलिंग, मिस वर्ल्ड होण्यापूर्वी मिळाला पहिला चित्रपट...

आपल्या सौंदर्य आणि अभिनयाने बॉलिवूड आणि जगभरातील सर्वांच्या मनावर राज्य करणारी ऐश्वर्या राय- बच्चन ही आज, १ नोव्हेंबरला ५२ वा वाढदिवस साजरा करत आहे. जेव्हा जेव्हा तिचे नाव येते, तेव्हा लोकांना तिचे ग्लॅमर, सौंदर्य आणि साधेपणा आठवतो. ऐश्वर्याने तिच्या कारकिर्दीत जी उंची गाठली आहे, ती एखाद्या स्वप्नापेक्षा कमी नाही. खूप कमी लोकांना माहिती आहे, की जर ऐश्वर्याला मिस वर्ल्डचा किताब मिळाला नसता तर तिचा पहिला चित्रपट राजा हिंदुस्तानी असता... तथापि, नशिबाने वेगळा मार्ग निवडला आणि तिचा पहिला चित्रपट ‘प्यार हो गया’ बनला. ही कथा तिच्या अनोख्या कारकिर्दीच्या प्रवासाच्या सुरुवातीचा एक छोटासा भाग आहे...

ऐश्वर्या रायचा जन्म १ नोव्हेंबर १९७३ रोजी कर्नाटकातील मंगलोर येथे झाला. ती एका सामान्य कुटुंबात वाढली, परंतु लहानपणापासूनच तिला अभ्यास आणि कला यात रस निर्माण झाला. ऐश्वर्याला विज्ञान आणि प्राणीशास्त्राची आवड होती आणि तिला डॉक्टर बनण्याची आकांक्षा होती. नंतर तिचा मार्ग बदलला आणि तिने मुंबईत आर्किटेक्चरचा अभ्यास सुरू केला. अभ्यासासोबतच तिने मॉडेलिंगच्या जगात प्रवेश केला आणि हे तिचे पहिले मोठे पाऊल होते, ज्याने तिला ग्लॅमरकडे आकर्षित केले.

करिअरचा एक महत्त्वाचा टप्पा
ऐश्वर्या नववीत असताना कॅमेलिनसाठी मॉडेलिंगला सुरुवात केली. त्यानंतर ती पेप्सी, फ्रूटी आणि इतर अनेक प्रमुख ब्रँडच्या जाहिरातींमध्ये दिसली. या जाहिरातींमुळे तिला लोकप्रियता मिळाली आणि लोक तिचा चेहरा ओळखू लागले. मॉडेलिंगमध्ये काम करत असतानाच तिने सौंदर्य स्पर्धांच्या जगात प्रवेश केला. १९९४ मध्ये मिस इंडिया रनर-अप झाल्यानंतर तिने मिस वर्ल्डचा किताब जिंकून इतिहास रचला. हा विजय तिच्या कारकिर्दीत एक महत्त्वाचा टप्पा ठरला.

राजा हिंदुस्तानी ठरला असता पहिला चित्रपट
ऐश्वर्याची चित्रपटसृष्टीतील कारकिर्द थोडी वेगळी सुरू झाली. एका मुलाखतीत तिने स्वतः सांगितले होते की जर ती मिस वर्ल्ड झाली नसती तर तिचा पहिला चित्रपट "राजा हिंदुस्तानी’ असता. पण तिचा पहिला चित्रपट १९९७ मध्ये "प्यार हो गया’ होता. या चित्रपटाने तिला बॉलिवूडमध्ये ओळख मिळवून दिली आणि प्रेक्षकांनी तिच्या अभिनयाचे कौतुक केले. त्यानंतर तिने सतत काम केले आणि चित्रपटांमध्ये तिचे स्थान निर्माण केले. तिच्या काही संस्मरणीय चित्रपटांमध्ये ‘हम दिल दे चुके सनम', ‘खाकी', ‘देवदास', ‘धूम २', ‘मोहब्बतें', ‘जोधा अकबर', ‘ताल' आणि ‘गुरु' यांचा समावेश आहे. ऐश्वर्याने केवळ बॉलिवूडमध्येच नाही तर हॉलिवूड चित्रपटांमध्येही काम केले आहे, ज्यात ‘द पिंक पँथर २', ‘प्रोव्होक्ड', ‘मिस्ट्रेस ऑफ स्पाइसेस' आणि ‘ब्राइड अँड प्रिज्युडिस' यांचा समावेश आहे. २००३ मध्ये ऐश्वर्या राय कान्स फिल्म फेस्टिव्हल ज्युरी असलेली पहिली भारतीय अभिनेत्री बनली. तिला २००९ मध्ये ‘पद्मश्री' आणि २०१२ मध्ये फ्रेंच ‘ऑर्डर ऑफ आर्ट्‌स अँड लेटर्स' पुरस्कारदेखील मिळाला.