सिल्लोड (मेट्रोपोलिस पोस्ट वृत्तपत्राच्या सौजन्याने) : भरधाव हायवाने समोरून पिकअप वाहनाला जोरात धडक दिली. यात पिकअपमधील दोन प्रवाशांचा जागीच मृत्यू झाला, तर एक जण गंभीर जखमी झाला. ही घटना सिल्लोड-भोकरदन रस्त्यावरील पिंपरी फाट्यावर शनिवारी (११ ऑक्टोबर) रात्री ११ च्या सुमारास घडली. विवेक रेवनाथ जेठे (वय २८, रा. टाकळी म्हसला, ता. सिल्लोड) व योगेश गजानन सोनवणे (वय २८, रा. जळगाव सपकाळ, ता. भोकदरन, जि. जालना) अशी मृत्यू झालेल्यांची नावे आहेत. पवन गायकवाड (वय २७, रा. सराटी, ता. फुलंब्री) हा गंभीर जखमी आहे.
बुलडाणा जिल्ह्यातील चिखली येथून दुकानाचे काही साहित्य आणण्यासाठी पिकअप वाहन घेऊन (क्र. एमएच २० इएल ५३५९) योगेश, विवेक व पवन सिल्लोड येथून जात होते. सिल्लोड -भोकरदन रस्त्यावर भोकरदनकडून भरधाव येणाऱ्या हायवा ट्रकने (क्र. एमएच १७ बीवाय ०००४) त्यांना समोरून जोरात धडक दिली. यात पिकअपचा अक्षरशः चुराडा झाला. तिघेही पिकअपमध्ये फसले. सहायक पोलीस निरीक्षक रवींद्र ठाकरे, पोलीस अंमलदार पंडित फुले, दीपक इंगळे, दीपक पाटील, ग्रामस्थ समाधान शिरसाठ, श्रीरंग गाडेकर, कृष्णा शिरसाठ यांनी योगेश, विवेक, पवनला पिकअपमधून काढून रुग्णवाहिकेतून सिल्लोड उपजिल्हा रुग्णालयात आणले.
मात्र डॉक्टरांनी योगेश व विवेकला तपासून मृत घोषित केले. पवनवर प्रथमोपचार करून पुढील उपचारासाठी छत्रपती संभाजीनगरच्या घाटी रुग्णालयात हलविण्यात आले. अपघातानंतर हायवाचालक पळून चालला होता. नागरिकांच्या माहितीवरून सिल्लोड ग्रामीण पोलिसांनी सिल्लोड शहराजवळ त्याला पाठलाग करून पकडले. हायवा सिल्लोड ग्रामीण पोलीस ठाण्यात जमा केला आहे. हायवाचालकाविरुद्ध गुन्हा दाखल केला आहे. योगेश अविवाहित होता, तर विवेकचा १ वर्षापूवी विवाह झाला होता. त्याला २ महिन्यांची मुलगी आहे.
पैठणमध्ये स्कुटी-दुचाकी अपघातात एकाचा मृत्यूपैठण-शहागड रस्त्यावरील मायगाव फाट्यावर रविवारी (१२ ऑक्टोबर) स्कुटी व दुचाकीची समोरासमोर धडक झाली. यात स्कुटीस्वार प्रशांत तुकाराम फुलारे (वय २९, रा. अहिल्यानगर) यांचा जागीच मृत्यू झाला. दुचाकीवरील समद उमराव पठाण (वय ५५) व हसनेन अमीर पठाण (वय ५, दोघे रा. घारी, ता. पैठण) गंभीर जखमी झाले आहेत. ते कुरणपिंपरी येथील पाहुण्यांकडील कौटुंबिक कार्यक्रम आटोपून गावाकडे परतत होते. त्याचवेळी बोरगाव (ता. गेवराई, जि. बीड) येथून स्कुटीने फुलारे पैठणकडे येत होते. जखमींना छत्रपती संभाजीनगरच्या घाटी रुग्णालयात हलवले आहे.
.jpeg)
.jpeg)
