वैजापूर (मेट्रोपोलिस पोस्ट वृत्तसेवा) : देवगाव रंगारी (ता. कन्नड) पोलीस ठाण्यातील पोलीस नाईक नानासाहेब रामजी दिवेकर (वय ४८, मूळ रा. बळ्हेगाव, ता. वैजापूर, ह. मु. पडेगाव, छत्रपती संभाजीनगर) यांची मूळगावी बळ्हेगाव येथे निर्घृण हत्या करून घराशेजारीच मृतदेह पुरल्याची धक्कादायक घटना रविवारी (४ जानेवारी) सायंकाळी साडेसहाच्या सुमारास समोर आली होती. हा खून त्यांचाच भाऊ लहानू रामजी सातदिवे (दिवेकर) याने केल्याचे तपासात समोर आले आहे. कौटुंबिक आणि वैयक्तीक वादातून खून केल्याची कबुली त्याने पोलिसांत दिली.
शुक्रवारी (२ जानेवारी) रात्री नानासाहेब हे घरात झोपलेले असताना बळ्हेगावमध्ये राहणाऱ्या लहानूने त्यांच्या डोक्यात धारदार शस्त्राचे वार करून हत्या केली. त्यानंतर घराजवळील पत्र्याच्या शेडमध्ये खड्डा करून पुरून टाकले. शिऊर पोलिसांनी रविवारी रात्री साडेनऊला खुनाचा गुन्हा दाखल केला होता. नानासाहेब हे देवगाव रंगारीला पडेगाव येथून ये-जा करत होते. कौटुंबिक वादामुळे त्यांची पत्नी ३ वर्षांपासून माहेरी राहते. मुलगा धुळे येथील पोलीस अकादमीत प्रशिक्षण घेत आहेत. नानासाहेब यांचे वृद्ध वडील रामाजी दिवेकर हे मूळगावी बळ्हेगावला राहत होते. १ जानेवारीला ते कर्तव्यावर होते. वडिलांना भेटण्यासाठी १ जानेवारीला मूळगावी गेले. २ जानेवारीच्या सकाळपर्यंत ते संपर्कात होते. सोशल मीडियावरही सक्रिय होते. नंतर त्यांचा संपर्क तुटला. त्यांनी पोलीस ठाण्यात रजाही टाकलेली नव्हती.
दोन दिवस वडील घरी न परतल्याने आणि फोनही लागत नसल्याने त्यांच्या मुलाने बळ्हेगावच्या सरपंचांना कॉल केला. सरपंचांनी त्यांच्या गावातील घरी जाऊन भावबंदांकडे चौकशी केली. त्यावेळी नानासाहेब २ जानेवारीला आले होते. मात्र त्यानंतर कुठे गेले, याची माहिती नसल्याचे भावबंदांनी सांगितले. त्यानंतर त्यांच्या मुलाने शिऊर पोलिसांना कळवले. प्रकरण गंभीर असल्याने शिऊर पोलिसांनी रविवारी दुपारी बळ्हेगाव येथील घराची बारकाईने पाहणी केली. त्यावेळी दिवेकरांचा फ्लाइट मोडवर टाकलेला मोबाइल पलंगाखाली दिसला. घराशेजारील पडीक जागेत माती उकरलेली दिसली. त्यामुळे संशय वाढला. पोलिसांनी तेथे खोदकाम केले असता सायंकाळी साडेसहाच्या सुमारास मृतदेह बाहेर काढण्यात आला. घटनेची माहिती पोलीस अधीक्षक डॉ. विनयकुमार राठोड, उपविभागीय पोलीस अधिकारी भागवत फुंदे, सहायक पोलीस निरीक्षक वैभव रणखांब यांना मिळताच त्यांनीही घटनास्थळी धाव घेऊन पाहणी केली होती.
पोलिसांनी त्यांच्या भावबंदांचे जबाब नोंदवले असताना, जबाबात तफावत येत असल्याने तिघांना चौकशीसाठी ताब्यात घेतले होते. त्यातील लहानूने खुनाची कबुली दिली. अधिक तपास शिऊर पोलीस करत आहेत. ही कारवाई पोलीस अधीक्षक डॉ. विनयकुमार राठोड, अप्पर पोलीस अधीक्षक अन्नपूर्णा सिंह यांच्या मार्गदर्शनाखाली उपविभागीय पोलीस अधिकारी भागवत फुंदे, स्थानिक गुन्हे शाखेचे पोलीस निरीक्षक विजयसिंह राजपूत, शिऊर पोलीस ठाण्याचे सहायक पोलीस निरीक्षक वैभव रणखांब, स्थानिक गुन्हे शाखेचे सहायक पोलीस उपनिरीक्षक पवन इंगळे, पोलीस उपनिरीक्षक महेश घुगे, केतन उगले, पोलीस अंमलदार प्रमोद पाटील, कासम शेख, सचिन राठोड, सुनिल गोरे, विष्णू गायकवाड, शिवानंद बनगे, अशोक वाघ, सचिन सोनार, दीपक सुरोशे, नीलेश कुडे, अनिल काळे, बलविर बहुरे, महेश बिरुटे, शिवाजी मगर, गणेश गोरक्ष, किशोर आघाडे, सुरेश पवार, आकाश बोरकर, अनिल गवळी, संभाजी आंधळे यांनी केली.
.jpg)
.jpg)
