४ दिवसांपासून बेपत्ता शेतकऱ्याचा मृतदेह आढळला विहिरीत, फुलंब्री तालुक्यात खळबळ

By City News Desk

On 22 Nov 2025

४ दिवसांपासून बेपत्ता शेतकऱ्याचा मृतदेह आढळला विहिरीत, फुलंब्री तालुक्यात खळबळ

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

फुलंब्री (मेट्रोपोलिस पोस्ट वृत्तसेवा) : फुलंब्री तालुक्यातील चिंचोली (नकीब) शिवारातील विहिरीत ५४ वर्षीय शेतकऱ्याचा मृतदेह आढळल्याने खळबळ उडाली. ते चार दिवसांपासून बेपत्ता होते. शुक्रवारी (२१ नोव्‍हेंबर) सकाळी सातला मृतदेह विहिरीत तरंगताना आढळला.

विलास बाबूराव जंगले (वय ५४, रा. चिंचोली नकीब ) असे मृत्यू झालेल्या शेतकऱ्याचे नाव आहे. ते १८ नोव्हेंबरला सकाळी ११ वाजता घरातून बाहेर पडले होते. चार दिवस उलटूनही घरी परतले नव्हते. नातेवाइक त्यांचा शोध घेत असताना शुक्रवारी सकाळी सातला गावाजवळीलच गट नं. २४४मधील विहिरीत त्यांचा मृतदेह दिसून आला. पिशोर पोलिसांनी घटनास्‍थळी येऊन पंचनामा केला.

ग्रामस्थांच्या मदतीने मृतदेह बाहेर काढला. मृतदेह कुजलेल्या अवस्थेत असल्याने घटनास्‍थळीच बाबरा येथील प्राथमिक आरोग्य केंद्रातील डॉक्टरांनी उत्तरीय तपासणी केली. शुक्रवारी दुपारी तीनच्या सुमारास त्यांच्यावर अंत्यसंस्कार करण्यात आले. त्यांच्या पश्चात पत्नी, दोन मुले, सून असा परिवार आहे. त्यांनी आत्‍महत्‍या केली, की अपघाताने विहिरीत पडले, हे अद्याप समोर आलेले नाही. पिशोर पोलिसांनी आकस्मिक मृत्यूची नोंद करून तपास सुरू केला आहे.