सुसाट कारने आधी दुचाकीला उडवले, नंतर ट्रकला धडकली!; गल्लेबोरगावजवळील भीषण अपघात, २ गंभीर जखमी

खुलताबाद (मेट्रोपोलिस पोस्ट वृत्तसेवा) : सुसाट कारने दुचाकीला उडवल्यानंतर समोरून येणाऱ्या ट्रकला धडकली. यात दुचाकीवरील दोघे गंभीर जखमी झाले आहेत. कारचालक दारू पिलेला होता, असे प्रत्‍यक्षदर्शींनी सांगितले. हा अपघात सोलापूर- धुळे राष्ट्रीय महामार्गावरील गल्लेबोरगावजवळ (ता. खुलताबाद) रविवारी (१८ जानेवारी) रात्री ९:१५ वाजता घडला.

गल्लेबोरगावजवळ उड्डाणपुलाचे काम सुरू असून, सध्या एकेरी वाहतूक वळविण्यात आली आहे. अनेक दिवसांपासून पथदिवेही बंद आहेत. तात्पुरते दुभाजकही टाकलेले नाही. त्यामुळे अपघातांचे प्रमाण वाढले आहे. कार (क्र. एमएच १५ एफएफ ९३४७) छत्रपती संभाजीनगरहून नाशिककडे जात होती. त्याचवेळी दुचाकीने (क्र. एमएच २६ सीएस १८०८) वाल्मीक अशोक गायकवाड (वय ३२), विलास गणेश कुऱ्हाडे (वय ३, दोघे रा. देवळाणा, ता. कन्नड) हे देवळाणा (ता. कन्नड) येथे जात होते.

कारने दुचाकीला मागून जोरात धडक दिली.  त्यानंतर कार कन्नडकडून वेरूळकडे येणाऱ्या आयशर ट्रकला क्र. जीजे २३ एडब्ल्यू ४१०४) जोऊन धडकली. यात दुचाकीवरील वाल्मीक व विलास गंभीर जखमी झाले. त्यांना नागरिकांनी छत्रपती संभाजीनगर येथील घाटी रुग्णालयात दाखल केले. खुलताबाद पोलिसांनी कारचालकाला ताब्यात घेतले. अपघातात दुचाकीचा चक्काचूर, तर कारचेही मोठे नुकसान झाले. आयशर ट्रक रस्त्याच्या कडेला जाऊन थांबला. अपघातानंतर वाहतूक विस्कळीत होऊन वाहनांच्या लांबच लांब रांगा लागल्या. पोलिसांनी वाहतूक सुरळीत केली.