दोन फुल, एक माली... ‘तूने प्यार मेरा छीना...’ तरुणीने तिला आधी त्याच्या घरात झोडपले, गल्लीत आणून बुकलले, नंतर स्कुटी अंगावर घातली!, सिल्लोडच्या ‘लव्ह ट्रँगल’च्या ‘हॉरर’ किस्स्याने अवघ्या जिल्ह्यात उडाली खळबळ!!

सिल्लोड (मेट्रोपोलिस पोस्ट वृत्तपत्राच्या सौजन्याने) : सिल्लोड शहरातील प्रेमाच्या त्रिकोणाचा हॉरर किस्सा सध्या जिल्हाभर गाजत आहे. पहिल्या प्रेयसीचा हात सोडून प्रियकराने दुसरीला गळाला लावले आणि पहिलीसोबत ब्रेकअप केले. पण पहिली प्रेयसी प्रेमात इतकी आकंठ बुडालेली होती, की तू मेरा नही हो सकता तो किसी और का नहीं हो सकता, असे तिने ठाणले. दुसरी प्रेयसी त्याच्या घरात बसलेली असल्याचे कळताच संताप अनावर झालेली ही पहिली प्रेयसी थेट त्याच्या घरी धडकली. त्यानंतर जे घडलं, ते धक्कादायक आहे... सविस्तर बातमीत वाचूया...

खासगी बँकेत असिस्टंट मॅनेजर असलेली २५ वर्षीय प्रिया (नाव बदलले आहे) सिल्लोड शहरात आईसह राहते. तिच्या आईचे मावस काका सिल्लोड शहरातच टिळकनगरात राहतात. त्यांचा मुलगा मनीष (नाव बदलले आहे) याचे सिल्लोड शहरातील श्रीकृष्ण भागात राहणाऱ्या अनयासोबत (नाव बदलले आहे) दोन वर्षांपूर्वी प्रेमसंबंध होते. नंतर त्याने अनयासोबत ब्रेकअप केले. मात्र प्रियाच्या नादी लागल्यानेच आपल्याला मनीषने सोडले, असे वाटून अनया प्रचंड संतापात होती. शनिवारी रात्री आठच्या सुमारास प्रिया ही आईसोबत आईच्या मावस काकांकडे म्हणजेच मनीषच्या घरी टिळकनगरला भेटायला आली होती.

तिथे कौटुंबिक गप्पा सुरू असताना अचानक रात्री साडेआठच्या सुमारास अनया ही स्कुटीवर आली. स्कुटी घरासमोर लावून थेट घरात घुसली. प्रियाला म्हणाली, की तू यांच्या घरी कशाला आली? तुझे येथे काय काम आहे? असे म्हणून तिने प्रिया व मनीष यांचे अफेअर आहे, असे म्हणत प्रियाला चापटाने मारहाण करू लागली. त्यावेळी प्रियाची आई भांडण सोडविण्यासाठी आली असता अनयाने तिलाही शिवीगाळ करून मारहाण केली. प्रियाच्या आईच्या गळ्यातील अडीच तोळ्यांचे अंदाजे अडीच लाख रुपये किमतीचे मिनीगंठण ओढून तोडले. नंतर प्रियाला अनयाने घरातून ओढत गल्लीत नेऊन शिवीगाळ करून चापटाने मारहाण केली.

नंतर ती निघून गेली. प्रिया व तिच्या आईने गळ्यातील तोडलेल्या मिनीगंठणचा शोध घेतला असता मिळून आले नाही. सिल्लोडच्या सरकारी रुग्णालयात उपचार घेऊन प्रिया सिल्लोड शहर पोलीस ठाण्याकडे तक्रार देण्यासाठी येत असताना पोलीस ठाण्याबाहेर सरकारी रुग्णालयाकडे जाणाऱ्या रस्त्यावर असताना समोरून रात्री साडेनऊच्या सुमारास अनया व तिची आई स्कुटी घेऊन आले. त्यांनी प्रियाच्या अंगावर स्कुटी घातली. त्यामुळे प्रिया खाली पडली. त्यानंतर दोघी मायलेकींनी प्रिया व तिच्या आईला पुन्हा चापट बुक्क्यांनी मारहाण केली.  प्रियाचे डोके इलेक्ट्रीक खांबावर आदळून गळा दाबला. गळ्यातील सोन्याची नऊ ग्रॅम वजनाचा गोफ (किंमत अंदाजे ९० हजार रुपये) तोडून घेतला.

त्याचवेळी अनयाची मोठी बहीणही तिथे आली. तिनेही प्रिया व तिच्या आईला शिवीगाळ करून चापटाने मारहाण करून केस ओढले. त्याचवेळी महिला पोलीस धावून आल्या. त्यांनी अनयाला आवरले. भांडण सोडवा-सोडव केली. जमलेल्या लोकांपैकी एका महिलेने सांगितले, की अनयाच्या आईने प्रियाच्या आईच्या गळ्यातील सोन्याचा गोफ तोडून नेला आहे. महिला पोलिसांनी प्रिया व तिच्या आईला पोलीस ठाण्यात आणले. त्यानंतर प्रियाने दिलेल्या तक्रारीवरून शहर पोलिसांनी अनया, तिची आई आणि बहिणीविरुद्ध गुन्हा दाखल केला आहे. अधिक तपास पोलीस उपनिरीक्षक ज्ञानेश्वर कायंदे करत आहेत.