छत्रपती संभाजीनगर (सीएससीएन वृत्तसेवा) : विहिरीत बुडून २९ वर्षीय युवती अन् ४५ वर्षीय पुरुषाचा मृत्यू झाल्याच्या घटना छत्रपती संभाजीनगर जिल्ह्यात समोर आल्या आहेत. छत्रपती संभाजीनगर तालुक्यातील काद्राबाद येथील बेपत्ता झालेल्या विवाहित युवतीचा बेबलावाडी शिवारातील विहिरीत मृतदेह आढळला, तर सिल्लोड तालुक्यातील घाटनांद्रा येथे पाय घसरून विहिरीत पडल्याने ४५ वर्षीय पुरुषाचा मृत्यू झाला.
छत्रपती संभाजीनगर तालुक्यातील काद्राबाद येथील कविता खुशालसिंग नायमा (वय २९) ही १२ सप्टेंबरच्या सकाळपासून बेपत्ता होती. याबाबत चिकलठाणा पोलीस ठाण्यात तिच्या नातेवाइकांनी तक्रार दिली होती. पोलीस तिचा शोध घेत होते. शुक्रवारी सकाळी बेबळावाडी शिवारातील गट नंबर ३२ मधील विहिरीत तिचा मृतदेह आढळला. ही शेती तिच्या वडिलांच्या नावावर आहे. ती विहिरीत पडली की तिने आत्महत्या केली हे अद्याप समोर आलेले नाही. पोलिसांनी घटनास्थळाचा पंचनामा करून मृतदेह उत्तरीय तपासणीसाठी घाटी रुग्णालयात दाखल केला. घटनेची नोंद चिकलठाणा पोलीस ठाण्यात करण्यात आली आहे.
दुसऱ्या घटनेत सिल्लोड तालुक्यातील घाटनांद्रा येथे शनिवारी दुपारी अडीचच्या सुमारास संतोष श्यामराव दांडगे (वय ४५, रा. घाटनांद्रा) गावातील विहिरीजवळ गेले होते. पाय घसरून तोल गेल्याने ते विहिरीत पडले. घटनेची माहिती कळताच ग्रामस्थांनी घटनास्थळी त्यांना विहिरीबाहेर काढले. नाकातोंडात पाणी गेल्याने त्यांचा जागेवर मृत्यू झाला. पोलिसांनी दांडगे यांना सिल्लोड ग्रामीण रुग्णालयात दाखल केले. उत्तरीय तपासणी केल्यानंतर डॉक्टरांनी मृतदेह नातेवाइकांच्या ताब्यात दिला. त्यानंतर रात्री आठच्या सुमारास त्यांच्यावर अंत्यसंस्कार करण्यात आले. याबाबत पोलिसांनी आकस्मिक मृत्यूची नोंद केली आहे. दांडगे यांच्या पश्चात पत्नी, दोन मुले, दोन मुली असा परिवार आहे.
.jpeg)
