पैठण (सीएससीएन वृत्तसेवा) : पैठण शहरातील डॉ. पूजा प्रभाकर व्हरकटे (वय २९) यांनी सहा महिन्यांच्या बाळासह पाटेगावच्या पुलावरून गोदावरी पात्रात उडी मारून आत्महत्या केली होती. त्यांच्या या कृत्याने शहरात खळबळ उडाली. त्यामागचे कारण आता उलगडताना दिसत असून, अंगावर दूध येत नसल्यानेच त्यांना नैराश्य आले होते. त्यातूनच त्यांनी टोकाचे पाऊल उचलल्याची माहिती डॉ. पूजा यांचे नातेवाइक बालाजी नलभे यांनी दिल्याचे वृत्त एका प्रसिद्ध दैनिकाने आजच्या अंकात दिले आहे.
चांगतपुरी येथील रहिवासी असलेले व पैठण शहरात राहणारे डॉ. प्रभाकर व्हरकटे यांच्या पत्नी डॉ. पूजा यांनी मंगळवारी (१ ऑक्टोबर) सायंकाळी पावणेसातच्या सुमारास ६ महिन्यांचे बाळ क्रिशसह पैठण- चांगतपुरी रस्त्यावरील पाटेगाव येथील पुलावरून गोदावरी नदीत उडी घेऊन आत्महत्या केली होती. त्यानंतर दोन तासांतच पूजा यांचा मृतदेह सापडला होता. मात्र क्रिशचा शोध लागत नव्हता. बुधवारी सकाळी छत्रपती संभाजीनगर महापालिकेच्या अग्निशमन दलाच्या पथकाने येऊन शोधकार्य हाती घेतले. दुपारी दीडला नदीतील पाण्यावर तरंगताना बाळाचा मृतदेह आढळला.
शवविच्छेदन करून दुपारी २ वाजता बाळाच्या पार्थिवावर अंत्यसंस्कार करण्यात आले. क्रिशचा जन्म झाल्यापासून डॉ. पूजा या बाळाची काळजी घेत होत्या. मात्र बाळाला दूध पाजता आले नसल्याने आठ दिवसांपासून त्या नैराश्यात होत्या. यातूनच त्यांनी टोकाचे पाऊस उचलल्याची शक्यता नातेवाइकांनी व्यक्त केल्याचे एका प्रसिद्ध दैनिकाने आजच्या वृत्तात म्हटले आहे. दरम्यान, डॉ. पूजा यांच्या मृतदेहाची बुधवारी सकाळी घाटी रुग्णालयात उत्तरीय तपासणी करण्यात आली. त्यानंतर सकाळी अकराला त्यांच्या पार्थिवावर अंत्यसंस्कार करण्यात आले.
याप्रकरणी पोलिसांकडे बुधवारी सायंकाळपर्यंत कोणीही तक्रार दाखल केली नसल्याचे पोलीस निरीक्षक संजय देशमुख यांनी पत्रकारांना सांगितले. बाळाच्या शोधकार्यात छत्रपती संभाजीनगर महापालिकेच्या अग्निशमन दलाचे मुख्य अग्निशमन अधिकारी रायबा पाटील, उप अग्निशमन केंद्र अधिकारी अशोक खांडेकर, ड्युटी ऑफिसर वसीम पठाण, जवान दिनेश मुंगसे, केतन धाडगे, संग्राम मोरे, प्रसाद शिंदे, सुमित कल्याणकर, अजिंक्य भगत, रवी दुधे, मतीन शेख, नंदकिशोर घुगे यांच्यासह पीएसआय बुरकुल, ओहोळ, नुसरत शेख, मोकळे यांनी भाग घेतला.
.jpeg)
.jpeg)
