फुलंब्री (सीएससीएन वृत्तसेवा) : विधानसभेच्या फुलंब्री मतदारसंघात उमेदवारीवरून काँग्रेसमध्ये नाराजीनाट्य कायम असताना, दुसरीकडे महायुतीच्या जोरबैठका सुरू झाल्या आहेत. सभा, भेटीगाठी घेऊन वातावरण निर्मिती करण्याचा प्रयत्न महायुतीच्या उमेदवार अनुराधा चव्हाण करत आहेत. ज्या कल्याण काळे यांनी जालना लोकसभेत पराभूत केले, त्यांचे फुलंब्रीत वर्चस्व असल्याने हे वर्चस्व मोडित काढण्यासाठी आता रावसाहेब दानवे सरसावल्याचे चित्र आहे. फुलंब्रीत हरिभाऊ बागडे आणि कल्याण काळे यांच्यातील उभा संघर्ष जनतेने पाहिला आहे. हरिभाऊ बागडे राजस्थानचे राज्यपाल असल्याने या विधानसभा निवडणुकीत त्यांना थेट प्रचाराच्या मैदानात उतरता येत नाही. त्यामुळे त्यांची उणीव रावसाहेब दानवे भरून काढत आहेत.
काँग्रेसतर्फे डॉ. कल्याण काळे यांचे भाऊ जगन्नाथ काळे निवडणूक लढण्यास इच्छुक होते. मात्र काँग्रेसने त्यांना उमेदवारी दिली नाही. मनोज जरांगे यांच्याकडून काळे यांना अपेक्षा होत्या. तीही पूर्ण झाली नाही. त्यामुळे ते नाराज असल्याची चर्चा असून, अद्याप तरी विलास औताडे यांच्या प्रचारात सहभागी झाल्याचे दिसून आले नाही. ते औताडेंसाठी प्रयत्न करणार का, असा प्रश्न निर्माण झाला आहे. या मतदारसंघावर राष्ट्रवादी काँग्रेस शरद पवार गट, ठाकरे गटाचा दावा होता. मात्र काँग्रेसकडे मतदारसंघ राहिल्याने त्यांचीही नाराजी कायम आहे. रावसाहेब दानवे यांच्यावर छत्रपती संभाजीनगर आणि जालना जिल्ह्यातील उमेदवार निवडून आणण्याची जबाबदारी आहे. सरकारमधील कोणतेही पद सध्या त्यांच्याकडे नसल्याने ते पूर्ण ताकदीनिशी उमेदवारांसाठी मैदानात उतरले असून, त्यातल्या त्यात फुलंब्रीकडे त्यांनी विशेष लक्ष दिले आहे.
सिल्लोडमध्ये अब्दुल सत्तारांची कोंडी भाजपने केलेली असल्याने फुलंब्रीत शिंदे गटाने भाजपची कोंडी चालवली असली तरी एकूणच अनुराधा चव्हाण यांना मिळत असलेला प्रतिसाद पाहता शिंदे गटाची ही खेळी कितपत यशस्वी ठरेल, याबद्दल साशंकता आहे. शिंदे गटाचे बंडखोर उमेदवार रमेश पवार निवडणूक रिंगणात कायम आहेत. हरिभाऊ बागडे यांनी फुलंब्रीवर अपवाद वगळता भगवा कायम ठेवला आहे. त्यांची परंपरा अबाधित ठेवण्याची जबाबदारी अनुराधा चव्हाण यांच्यावर आली आहे. काँग्रेसमधील सुंदोपसुंदी बघता त्यांची वाटचाल सुकर मानली जात असली तरी मराठा मतदान कोणाच्या बाजूने झुकते यावरही बरेच गणित अवलंबून आहे.
रावसाहेब दानवेंचा घणाघात…राज्यात लाडकी बहीण, लाडका भाऊ आणि लाडका शेतकरी या योजना गेम चेंजर ठरणार असल्याने विधानसभा निवडणुकीत महायुतीचे सर्वाधिक उमेदवार निवडून येणार आहेत, असा दावा करत भाजपाचे प्रचारप्रमुख तथा माजी केंद्रीय राज्यमंत्री रावसाहेब दानवे यांनी तुम्ही तुमचे मत लाडकी बहीण अनुराधाताई यांना देण्याचे आवाहन केले. रावसाहेब दानवे यांनी अनुराधा चव्हाण यांच्या प्रचारार्थ लाडसावंगी, पळशी व गोलटगाव येथे गुरुवारी सभा घेतली. या वेळी उमेदवार अनुराधा चव्हाण म्हणाल्या, की उद्याचे व्हिजन घेऊन मी निवडणूक लढवत आहे. मी गेली अनेक वर्षे तुमच्या सेवेत आहे. तुमच्या हक्काचा आमदार बनवण्यासाठी मला विजयी करा, असे आवाहन त्यांनी केले. दरेगाव, काचनापूर, औरंगपूर, रामवाडी, दुधड, भांबरडा, जयपूर, बनगाव, गेवराई कुबेर, वरझडी, वडखा आदी गावांमध्ये त्यांनी प्रचार फेरी काढण्यात आली. प्रचार फेरीत ज्येष्ठ नेते सजनराव मते, रामराव शेळके, विजय औताडे, रामबाबा शेळके, भाजपा तालुकाध्यक्ष राधाकिसन पठाडे, अर्जुन शेळके, सरपंच रमेश शिंदे, बापू घडामोडे, जिल्हाध्यक्ष सजन बागल आदींचा सहभाग होता. लाडसावंगीच्या सभेला बापू घडामोडे, बाजार समिती सभापती राधाकिसन पठाडे, रामूकाका शेळके, विजय औताडे, सजन मते, सजन बागल, सरपंच मीरा शिंदे आदी हजर होते.
.jpg)
