दारूच्या नशेत तर्रर्र शिक्षकाचा शाळेत राडा; २ विद्यार्थ्यांनाही बुकलून काढले!; गंगापूरच्या या गावातील जि. प. शाळेतील धक्कादायक प्रकार

गंगापूर (सीएससीएन वृत्तसेवा) : महमदपूर (ता. गंगापूर) येथील जिल्हा परिषद शाळेच्या एका शिक्षकाने कहरच केला. दारूच्या नशेत शाळेत धिंगाणा घातला. एवढेच नाही तर दोन विद्यार्थ्यांना मारहाणही केली. पालकांना शिक्षकाचा प्रताप कळताच त्‍यांनी शाळेत धाव घेऊन या शिक्षकाला पकडून पोलिसांच्या ताब्‍यात दिले. शुक्रवारी (१८ ऑक्‍टोबर) सकाळी हा प्रकार घडला.

पोलिसांनी शिक्षकाला लासूर स्टेशन येथील प्राथमिक आरोग्य केंद्रात नेत वैद्यकीय तपासणी करवली. त्‍याचा अहवाल शनिवारी (१९ ऑक्‍टोबर) आल्यानंतर शिक्षकाविरद्ध गुन्हा दाखल होण्याची शक्‍यता आहे. घटनेबाबत केंद्रप्रमुख विठ्ठल नरोडे यांनी पत्रकारांना सांगितले, की मला घटनेबाबत कळताच तातडीने महमदपूर शाळेत गेलो. पालक व ग्रामस्थ शिक्षकाविरुद्ध प्रचंड आक्रमक झालेले होते. मी सर्वांची समजूत काढून पोलिसांना शाळेत बोलावून घेतले.

शुक्रवारी सकाळी नेहमीप्रमाणे एक शिक्षक दारू पिऊन आला. नशेत तर्रर्र असताना त्याने एका वर्गात जाऊन धिंगाणा घालायला सुरुवात केली. दोन विद्यार्थ्यांना बदडूनही काढले. शिक्षकाचा प्रताप गावात कळताच ग्रामस्थांनी शाळेत धाव घेतली. यापूर्वीही या शिक्षकाचे अनेक प्रताप समोर आलेले आहेत. तो कायम दारू पिऊनच शाळेत येतो. मात्र आजवर ग्रामस्थांनी दुर्लक्ष केले होते. मात्र शुक्रवारच्या प्रतापामुळे ग्रामस्थांचा संयम ढळला आणि त्‍यांनी या शिक्षकाला धडा शिकवण्यासाठी त्‍याचा ऑन दी स्पॉट पंचनामा केला. या शिक्षकाविरुद्ध गुन्हा दाखल करण्याची मागणी होत आहे.