न.पा.निवडणूक : जिल्हाधिकाऱ्यांनी घेतला निवडणूक पूर्वतयारीचा आढावा

छत्रपती संभाजीनगर (मेट्रोपोलिस पोस्ट वृत्तसेवा) : जिल्ह्यातील नगरपालिका निवडणुकीसाठी उद्या, २ डिसेंबरला मतदान होणार आहे. त्यासाठी जिल्ह्यातील सर्व नगरपालिका क्षेत्रात होत असलेल्या मतदान पूर्वतयारीचा सोमवारी (१ डिसेंबर) जिल्हाधिकारी दिलीप स्वामी यांनी आढावा घेतला.

जिल्हा मुख्यालयातून दुरदृष्य प्रणालीद्वारे हा आढावा घेण्यात आला. उपजिल्हा निवडणूक अधिकारी देवेंद्र कटके, सहायक आयुक्त नगरपालिका प्रशासन ऋषिकेश भालेराव, जिल्हा सूचना विज्ञान अधिकारी शेळके आदी उपस्थित होते. पोलीस अधीक्षक डॉ. विनयकुमार राठोड तसेच सर्व निवडणूक निर्णय अधिकारी हे दुरदृष्य प्रणालीद्वारे सहभागी झाले होते. मतदान केंद्रावरील व्यवस्था, कायदा सुव्यवस्था, प्रतिबंधात्मक क्षेत्र, आचारसंहिता अंमलबजावणी याबाबत सद्यस्थिती जाणून घेत जिल्हाधिकारी स्वामी यांनी सर्व अधिकारी, कर्मचाऱ्यां समन्वय राखून मतदान प्रक्रिया पारदर्शक व निर्भय वातावरणात कशी पार पडेल यासाठी कार्य करावे, असे सांगितले. सर्व मतदान प्रक्रियेवर लक्ष ठेवण्यासाठी जिल्हाधिकारी कार्यालयात नियंत्रण कक्ष तयार करण्यात येणार आहे. तेथून सर्व प्रक्रियेवर लक्ष ठेवले जाणार आहे, असेही यावेळी सांगण्यात आले.

कामगार-कर्मचाऱ्यांना मतदानासाठी भरपगारी सुट्टी
नगर परिषद, नगर पंचायत निवडणुकीसाठी मतदारांना मतदान करण्यासाठी भरपगारी सुट्टी देण्याबाबत शासन आदेश निर्गमित झाला आहे. त्यानुसार निवडणूक होणाऱ्या मतदान क्षेत्रात मतदार असलेले कामगार, अधिकारी, कर्मचारी यांना मग ते कामानिमित्त निवडणूक होणाऱ्या क्षेत्राबाहेर कार्यरत असले तरीही त्यांना निवडणुकीच्या दिवशी मतदानाचा हक्क बजावण्यासाठी भरपगारी सुट्टी देण्यात यावी. ही सुट्टी उद्योग, ऊर्जा व कामगार विभागांतर्गत येणाऱ्या सर्व आस्थापना, कारखाने, दुकाने इत्यादींना लागू राहिल (उदा. खासगी कंपन्या यामधील आस्थापना, सर्व दुकाने व इतर आस्थापना, निवासी हॉटेल, खाद्यगृहे, अन्य गृहे, नाट्यगृहे, व्यापार, औद्योगिक उपक्रम किंवा इतर आस्थापना तसेच माहिती व तंत्रज्ञान कंपन्या, शॉपिंग सेंटर, मॉल्स, रिटेलर्स इ.) अपवादात्मक परिस्थितीत कामगार, अधिकारी, कर्मचारी इत्यादींना पूर्ण दिवस सुट्टी देणे शक्य नसेल तर, मतदान क्षेत्रातील कामगारांना मतदानाचा हक्क बजावण्यासाठी सुट्टी ऐवजी कमीत कमी दोन तासांची सवलत देता येईल. कोणत्याही परिस्थितीत मतदारांना मतदानासाठी दोन तासांची सवलत मिळेल याची दक्षता आस्थापना मालकांनी घेणे आवश्यक राहील.