नरेंद्र मोदींना राजकारणात आणण्यात मोठा वाटा असलेल्या मधुभाई कुलकर्णींचे छ. संभाजीनगरमध्ये निधन

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगर शहरातील राष्ट्रीय स्वयंसेवक संघाचे ज्येष्ठ प्रचारक मधुभाई ऊर्फ माधव विनायक कुलकर्णी (वय ८८) यांचे गुरुवारी (१८ सप्‍टेंबर) दुपारी साडेबाराला निधन झाले. त्यांनी देहदान केलेले असल्याने पार्थिव सायंकाळी घाटी रुग्णालयाला सुपूर्द करण्यात आले. त्याआधी सातारा येथील समर्पण संघ कार्यालयात त्यांचे पार्थिव अंत्यदर्शनासाठी ठेवले होते.

१५ मे १९३८ रोजी कोल्हापुरात जन्मलेल्या कुलकर्णी यांचे शालेय शिक्षण चिकोडी (जि. बेळगाव, राज्‍य कर्नाटक) येथे झाले होते. कोल्हापुरात त्यांचे मॅट्रिकपर्यंत शिक्षण झाले. पुढे १९५८ मध्ये मुंबईच्या रूपारेल कॉलेजमधून बी.ए. झाले. काही काळ त्यांनी मुंबई सेल्स टॅक्समध्ये नोकरी केली. नंतर १९६०-६१ मध्ये सोलापूरच्या दयानंद शैक्षणिक महाविद्यालयातून बी.एड. केले. शालेय जीवनापासूनच ते राष्ट्रीय स्वयंसेवक संघाशी जोडले गेले होते. १९६२ मध्ये ते संघाचे प्रचारक झाले.

२०१५ पर्यंत संघाच्या कार्यकारिणी मंडळाचे सदस्य होते. ज्येष्ठ प्रचारक म्हणून ते छत्रपती संभाजीनगरात कार्यरत राहिले. ते गुजरातमध्ये संघ प्रांत प्रचारक असताना नरेंद्र मोदी विभाग प्रचारक होते. मोदी यांच्या राजकारण प्रवेशामागे कुलकर्णी यांचा मोठा वाटा होता. त्यांनीच तसा प्रस्ताव दिला होता, अशी माहिती संघाच्या सूत्रांनी दिली. गेल्या काही दिवसांपासून कुलकर्णी यांच्यावर खासगी रुग्णालयात उपचार सुरू होते. पंतप्रधान नरेंद्र मोदी, गृहमंत्री अमित शाह यांनीही कॉल करून प्रकृतीची विचारपूस केली होती. सरसंघचालक डॉ. मोहन भागवत काही दिवसांपूर्वी त्यांना रुग्णालयात भेटून गेले होते.