अतिवृष्टीने छत्रपती संभाजीनगर शहरालाही ४०९ कोटींचा तडाखा; महापालिकेने पसरले सरकारपुढे हात!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : ऑगस्ट आणि सप्टेंबरमध्ये मराठवाड्याला झोडपून काढणाऱ्या पावसाने छत्रपती संभाजीनगर शहरवासियांनाही तब्बल ४०९ कोटी रुपयांचा तडाखा दिला आहे. आता महापालिका प्रशासन प्रस्ताव तयार करून या रकमेची मागणी राज्य सरकारकडे करण्याची तयारी करीत आहे.

गेल्या दोन महिन्यांत झालेल्या अतिवृष्टीने शहरातील सातारा, देवळाई, भावसिंगपुरा, नारेगाव, पडेगाव आदी शहराला लागून असलेल्या भागांत प्रचंड नुकसान झाले. अनेक भागांत रस्त्यांची दुर्दशा झाली. पूल खचले. नाल्याच्या संरक्षण भिंती भुईसपाट झाल्या. त्यामुळे अनेक भागांत पानी साचून अनेकांच्या घरांसोबतच व्यवसायांचेही मोठे नुकसान झाले. नुकसानीचा हा आकडा तब्बल ४०९ कोटींच्या घरात असल्याचे मनपाच्या पाहणीतून पुढे आले आहे. महापालिकेचे प्रशासक जी. श्रीकांत यांनी त्यावेळी नुकसानग्रस्त भागांची पाहणी करून आढावा घेतला होता.

आता नुकसान झालेल्या भागांत मनपाला दुरुस्तीची कामे हाती घ्यावी लागणार आहेत. सोबतच ही सगळी कामे पूर्ण करण्यासाठी महापालिकेकडे अवघे शंभर दिवसच उरलेले आहेत. कारण, सर्वोच्च न्यायालयाच्या आदेशानुसार ३१ जानेवारीपर्यंत महापालिकेच्या निवडणुकीची प्रक्रिया पूर्ण करावी लागणार आहे. त्यामुळे सुट्या वगळता महापालिकेकडे ही कामे पूर्ण करण्यासाठी फक्त शंभर दिवसच राहतील. या काळात म्हणजेच निवडणुकीची आचारसंहिता लागण्यापूर्वीच या कामांसाठीचे अंदाजपत्रक तयार करून त्याची वर्क ऑर्डर काढून ही कामे पूर्ण करून घ्यावीत, असा दम आयुक्तांनी आपल्या कर्मचाऱ्यांना भरला आहे.