औरंगपुरा ते जुना मोंढा रस्ता होणार ६० फुटांचा; १०० अतिक्रमणांनी गिळला रस्ता!, मार्किंगमुळे ‘पोलखोल’

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : दोन महिन्यांपासून थांबलेली शहरातील रस्ता रुंदीकरण मोहीम पुन्हा सुरू होणार आहे. मोहिमेत आता औरंगपुऱ्यातील महात्मा फुले पुतळा ते जुना मोंढा भागातील हरी मशीद हा रस्ता ६० फुटांचा होणार असून, महापालिकेच्या नगररचना विभागाने सोमवारी (६ ऑक्‍टोबर) केलेल्या मार्किंगमध्ये तब्बल शंभर मालमत्ताधारकांनी अतिक्रमण करून हा रस्ता गिळंकृत केल्याचे उघड झाले. आता रुंदीकरण करताना या शंभरपैकी काही मालमत्ता एक ते दीड मीटर तर काही ६ मीटरपर्यंत पाडाव्या लागणार असल्याचे निश्चित झाले आहे.

अत्यंत दाटीवाटीच्या आणि नेहमी वर्दळ असलेल्या गुलमंडी रस्त्याची पाहणी केल्यानंतर महापलिका प्रशासक जी. श्रीकांत यांनी या रस्त्यावरील काही धोकादायक इमारती अतिक्रमण विभागाला पाडायला लावल्या होत्या. सोबतच नगररचना विभागाला या रस्त्याचे सर्वेक्षण करून अतिक्रमणांचे मार्किंग करण्याचे आदेश दिले होते. त्यानुसार या विभागाच्या पथकाने सोमवारी मार्किंग केली. मार्किंगमध्ये गुलमंडी ते जुना मोंढा रस्त्यावर तब्बल शंभर मालमत्ताधारकांनी अतिक्रमण केल्याचे समोर आले.

एकानेच घेतली परवानगी 
मार्किंग करणाऱ्या पथकाला या रस्त्यावर केवळ एकाच मालमत्ताधारकाने परवानगी घेऊन मालमत्ता बांधल्याचे आढळले. मार्किंग करणाऱ्या मनपाच्या पथकासोबत एका मालमत्ताधारक महिलेने वादही घातला. पण पथकाने मालमत्ता बांधकाम परवानगीचा कागद मागितल्यावर या महिलेची बोलती बंद झाली. दरम्यान, आता या रस्त्याच्या प्रत्यक्ष रुंदीकरणाला दिवाळीनंतर सुरुवात होणार असल्याचे सांगण्यात येते. नगररचना उपसंचालक मनोज गर्जे यांच्या मार्गदर्शनाखाली नगररचनाकार राहुल मालखेडे आणि त्यांच्या सहासदस्यीय पथकाने मार्किंगची प्रक्रिया पूर्ण केली. हा रस्ता महत्त्वाचा व्यापारी पट्टा मानला जातो. रस्ता अरूंद असल्याने नेहमीच वाहतूक कोंडी होते.