आकाशवाणी जवळील RC बाफना ज्वेलर्समध्ये मोठी चोरी!; ग्राहक बनवून आलेल्या महिलेचा कारनामा ऐकून हैराण व्हाल...

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : आकाशवाणी चौकाजवळील आरसी बाफना ज्वेलर्समध्ये एवढे सीसीटीव्ही कॅमेरे, सुरक्षारक्षकांची फौज आणि कर्मचाऱ्यांची तीक्ष्ण नजर असूनही एक महिला ग्राहक बनून आली आणि तिने हातचलाखीने सोन्याच्या दोन अंगठ्या बोटात घातल्या आणि निघून गेली. तिने तिच्या नकली २ अंगठ्या ज्वेलर्सला भेट दिल्या आहेत. ही घटना सोमवारी (१० नोव्‍हेंबर) समोर आल्यानंतर खळबळ उडाली आहे.

आरसी बाफना ज्वेलर्सचे व्यवस्थापक विनोदकुमार दिलीपसिंग चौधरी (वय ६१, रा. देवळाई रोड बीड बायपास) यांनी मंगळवारी (११ नोव्हेंबर) जिन्सी पोलीस ठाणे गाठून या प्रकरणात तक्रार दिली आहे. तक्रारीनुसार, सोमवारी दुपारी सव्वा बाराला चौधरी हे नेहमीप्रमाणे ड्युटीवर आले. अंगठ्यांचे मोजमाप करत असताना एका ट्रेमध्ये दोन अंगठ्या नकली असल्याचे त्यांच्या लक्षात आले. त्यांनी लगेचच दुकानातील सीसीटीव्ही फूटेज तपासले असता २८ ऑक्टोबर रोजी दुपारी ३ वाजून ५२ मिनिटांनी एक महिला ही ग्राहक म्हणून दुकानात आली. कर्मचाऱ्याने तिला सेल्स वुमनने सोन्याच्या अंगठ्यांचे दोन ट्रे दाखवले. प्रत्येक ट्रेमध्ये एकूण १५ अंगठ्या होत्या.

ती महिला अंगठ्या बोटात घालून बघत होती. सेल्सवुमन आणखी डिझाइनच्या अंगठ्यांचा ट्रे आणण्यासाठी बाजूला जाताच महिलेने ट्रेमधील दोन सोन्याच्या अंगठ्या बोटात घातल्या आणि तिच्या बोटातील नकली बेंटेक्सच्या दोन अंगठ्या ट्रेमध्ये ठेवल्या. महिलेने हातचलाखीने दोन अंगठ्या बदली केल्याचे सीसीटीव्ही फूटेजमध्ये दिसून आले. महिलेने नेलेल्या अंगठ्यांपैकी एक अंगठी २२ कॅरेट सोन्याची १० ग्रॅमची (किंमत १ लाख रुपये) असून, दुसरी ९ ग्रॅमची ९० हजारांची आहे. एकूण १ लाख ९० हजार रुपयांच्या दोन अंगठ्या अनोळखी महिलेने गायब केल्याचे समोर आले. जिन्सी पोलिसांनी या महिलेविरुद्ध गुन्हा दाखल केला आहे. अधिक तपास पोलीस अंमलदार ध्रुवराज गोराडे करत आहेत.