मंत्री शिरसाट साहेब, जरा ही बातमी वाचाच... बांधकाम मजुरांना भांडी वाटप करायला ठेवलेल्यांनी काय केलं...

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : राज्‍य सरकार भलेही बांधकाम मजुरांच्या हितासाठी झटत असेल, पण मध्ये असलेल्या साखळीने बांधकाम मजुरांना वेठीस धरले आहे. सध्या बांधकाम मजुरांना सरकारकडून भांडी वाटप केली जातात. पण जाधववाडीत ज्‍यांच्यामार्फत ही भांडी वाटप केली जात आहे, त्‍यांच्याकडील व्यक्‍तींनी बांधकाम मजूर महिला आणि तिच्या मुलाला बेदम मारहाण केली. महिलेच्या मुलावर घाटी रुग्णालयात उपचार करण्यात आले. सिडको पोलिसांनी ३ जणांविरुद्ध गुन्हा दाखल केला आहे.

सुरज ज्ञानेश्वर राजपूत (वय २७, रा. हर्सूल, पिसादेवी रोड) याने या प्रकरणात तक्रार दिली आहे. तो कुटुंबासह राहतो व स्पर्धा परीक्षेची तयारी करतो. त्याची आई रंजना ज्ञानेश्वर राजपूत या बांधकाम कामगार असून, त्यांनी बांधकाम कामगार योजनेचा फॉर्म गेल्या वर्षी भरला होता. त्यावरून २४ ऑगस्टला ऑनलाइन अपॉइंटमेंट घेतल्यानंतर त्यांच्या मोबाइलवर घरसंसार उपयोगी वस्तू मिळण्याबाबत पावती मिळाली. मंगळवारी सकाळी १० ला सुरज व त्‍याची आई रंजना राजपूत हे जाधववाडीत आले. तिथे बांधकाम कामगार योजने अंतर्गत देण्यात येणाऱ्या घरसंसार उपयोगी (भांडी) वस्तू घेण्यासाठी दोघे मायलेक रांगेत लागले. दुपारी साडेतीनला सुरजच्या आईचा भांडे घेण्यासाठी काउंटरजवळ नंबर आला.

तेव्हा त्यांनी विचारले की, तुमच्याकडे घोषणापत्र आहे का? घोषणापत्र असेल तरच तुम्हाला भांडे देण्यात येईल. नाहीतर तुम्हाला भांडे देता येणार नाही. त्यावर सुरज म्हणाला, की वेबसाईटवर घोषणापत्रच नाही. मी ते कसे देऊ? त्यावर त्याठिकाणी असलेल्या दोन ते तीन अनोळखी व्यक्तींनी सुरज व त्याच्या आईला शिवीगाळ करून धक्काबुक्की करत दोघांना रांगेतून काढले. त्यावेळी सुरज म्हणाला, की आम्हाला रांगेतून का काढता? आमच्याकडे अपॉईंटमेंट लेटर आहे. त्यावर त्यांच्यातील एका व्यक्तीने सुरजच्या डाव्या खांद्याजवळील हाडावर त्याच्या हातातील कडे मारून मला जखमी केले. सुरज व त्‍याच्या आईने सिडको पोलीस ठाण्यात येऊन तक्रार दिली. त्‍यावरून पोलिसांनी ३ अनोळखी लोकांविरुद्ध गुन्हा दाखल केला आहे. अधिक तपास पोलीस अंमलदार नासेर शेख करत आहेत.

गृहपयोगी संचाचे वाटप पूर्णतः नि:शुल्क
महाराष्ट्र इमारत व इतर बांधकाम कामगार कल्याण मंडळ व  मे. मफतलाल इंडस्ट्रीज लि. यांच्या मार्फत छत्रपती संभाजीनगर जिल्ह्यातील १५ वितरण केंद्रांवर होत असलेल्या गृहपयोगी संचाच्या वाटपाबाबतच्या तक्रारीच्या पार्श्वभूमीवर पालकमंत्री संजय शिरसाट यांच्या अध्यक्षतेखाली बैठक घेण्यात आली. त्यात त्यांनी हे वितरण पूर्णतः निःशुल्क असून कुणाकडून पैशांची मागणी केल्यास तात्काळ पोलिसांत तक्रार द्यावी, असे आवाहन त्यांनी केले असल्याचे सहाय्यक कामगार आयुक्त  ग.भा. बोरसे यांनी कळविले आहे. बैठकीत वितरण केंद्र प्रतिनिधींना संचाचे वाटप मंडळाच्या नियमानुसार पूर्णतः नि:शुल्क करण्याचे स्पष्ट निर्देश देण्यात आले. केंद्रावर आर्थिक व्यवहार होत असल्यास संबंधित केंद्रावर तातडीने कारवाई करून ते बंद करण्यात येईल, असेही पालकमंत्री यांनी सूचना केल्या. संच वाटप मंडळाच्या आदेशानुसार भेट पद्धतीने (Appointment System) होणार असून, लाभार्थ्यांनी http://hikit.mahabocw.in/appoinment या संकेतस्थळावर भेट देऊन नियोजित वेळ घेऊन संच मिळवण्यासाठी दिनांक व वितरण केंद्राची निवड करावी लागणार आहे. कामगारांनी ओळखपत्र/आधारकार्ड व नियुक्ती पत्र घेऊन उपस्थित राहिल्यानंतरच संच प्रत्यक्ष दिला जाईल. कामगारांना आवाहन करण्यात आले आहे की, कोणत्याही एजंट, संघटना किंवा त्रयस्थ व्यक्तीकडे न वळता थेट मंडळाच्या प्रणालीतून संच मिळवावा. पैशांची मागणी केल्यास तात्काळ जवळच्या पोलीस स्टेशनमध्ये किंवा नियुक्ती पत्रावरील क्रमांकावर तक्रार दाखल करावी. उल्लेखनीय म्हणजे, या योजनेतील साहित्य वाटप करण्यासाठी बहुतांश ठिकाणी शिंदे गटाचे पदाधिकारी नेमल्याचे प्रकार समोर आले आहेत.