छत्रपती संभाजीनगर (मेट्रोपोलिस पोस्ट वृत्तसेवा) : शासकीय अभियांत्रिकी महाविद्यालयाच्या मतमोजणी केंद्रावरील लाठीमाराची दुसरी बाजू समोर आली आहे. सहायक पोलीस आयुक्त सागर देशमुख यांनी वेदांतनगर पोलीस ठाण्यात तक्रार दिली असून, त्यावरून माजी महापौर विलास विकास जैन यांच्यासह शिवा राजपूत, अभिषेक जीवनवाल यांच्याविरुद्ध आज, १७ जानेवारीला गुन्हा दाखल करण्यात आला आहे.
सहायक पोलीस आयुक्त सागर देशमुख यांनी तक्रारीत म्हटले आहे, की महापालिका निवडणुकीच्या मतमोजणीसाठी उस्मानपुऱ्यातील शासकीय अभियांत्रिकी महाविद्यालयाच्या केंद्रावर त्यांची बंदोबस्त प्रभारी म्हणून सकाळी ६ पासून नियुक्ती होती. मतमोजणी केंद्राकडे येणाऱ्या रस्त्यांवर एसएससी बोर्ड चौक, नागसेन चौक व महाविद्यालयाच्या मुख्य गेटपासून उजवीकडे २०० मीटर अंतरावर अशा तीन ठिकाणी जमावाचे नियोजन करण्यासाठी बॅरीकेटिंग करण्यात आले होते. पुरेसे अधिकारी व अंमलदारांचा बंदोबस्त लावण्यात आलेला होता. मतमोजणी केंद्रात अधिकारी, कर्मचारी तसेच उमेदवार व त्यांचे प्रतिनिधी येणार होते. त्या प्रत्येकाला निवडणूक अधिकाऱ्यांकडून ओळखपत्र (आय-कार्ड) देण्यात आले होते. ओळखपत्र पाहून मतमोजणी केंद्रात प्रवेश देण्यासाठी मतदान केंद्राच्या मुख्य गेटवर बंदोबस्त नेमण्यात आलेला होता.
जे उमेदवार व त्यांच्यासोबत पाच प्रतिनिधी आले आहेत यांनी मतमोजणी ओळखपत्र दाखवावे, सर्वांना ओळखपत्र पाहून प्रवेश दिला जाईल, असे पोलिसांकडून सांगण्यात येत होते. उमेदवार आणि त्यांच्या प्रतिनिधींचे नाव पुकारून ओखळपत्र तपासून आत सोडले जात होते. ही प्रक्रिया चालू असताना उमेदवार आणि त्यांच्या प्रतिनिधींची मुख्य गेट समोर खूप मोठ्या प्रमाणात गर्दी झाली. त्या दरम्यान विकास जैन, शिवा राजपूत, अभिषेक जीवनवाल हे गेटच्या बाहेरच्या बाजूला थांबून त्या ठिकाणी बंदोबस्तास असलेल्या पोलीस निरीक्षक प्रमोद कठाणे यांनी ओळखपत्र दाखविण्याच्या सुचना देऊनही ओळखपत्र न दाखवता वाद घालत होते. विकास जैन हे मी कोण आहे तुम्हाला माहीत नाही का, गेट उघडा, असे म्हणून गेट ढकलुन बेकायदेशीररित्या प्रवेश करत होते. तेथील अधिकारी व अंमलदार हे त्यांना तुमचे ओळखपत्र व यादीतील नाव दाखवा. ते पाहून तुम्हाला आतमध्ये सोडण्यात येईल, असे समजावत होते.
तरीही ते ऐकण्याच्या मनस्थितीत नव्हते. विकास जैन यांनी जोरात गेट ढकलून आत येऊन ओळखपत्र न दाखवता बेकायदेशीररित्या मतमोजणी केंद्रात प्रवेश करून बाचाबाची केली. बाचाबाची दरम्यान विकास जैन यांनी पोलीस निरीक्षक प्रमोद कठाणे यांच्या गळ्याला पकडून धक्काबुक्की केली. सहायक पोलीस निरीक्षक मिरधे यांनासुध्दा धक्काबुक्की केली. हा प्रकार पाहून एसीपी देशमुख यांच्यासह अन्य पोलीस अधिकाऱ्यांनी विकास जैन यांना समजावण्यासाठी हात धरून आत बोलविले. पण आत आल्यानंतर विकास जैन यांनी देशमुख यांच्या गळ्यास पकडून मागे ढकलत हल्ला केला. त्यावेळी गेटबाहेरील जमाव आरडाओरड करीत होता. त्यावेळी शिवा राजपूत, अभिषेक जीवनवाल गेट ढकलून आत आले. एसीपी देशमुख व पोलीस अधिकाऱ्यांवर हल्ला होत असल्याने तसेच गेट बाहेरील जमाव गेट ढकलून आत येत असल्याचे पाहून तेथील पोलिसांनी कायदा व सुव्यवस्था अबाधित राखण्यासाठी व परिस्थिस्ती नियंत्रणात आणण्यासाठी मर्यादेत राहून सौम्य बळाचा वापर केला. त्यादरम्यान एसीपी देशमुख आणि अन्य पोलीस अधिकाऱ्यांनी विकास जैन यांना मतमोजणी कक्षाकडे नेले. अधिक तपास पोलीस निरीक्षक प्रविणा यादव करत आहेत.
