छत्रपती संभाजीनगर (मेट्रोपोलिस पोस्ट वृत्तसेवा) : रिक्षाने सिडको बसस्थानकाकडे येण्यास निघालेल्या विद्यार्थ्याला रिक्षाचालक आणि त्याच्या दोन साथीदारांनी मारहाण करून लुटले. ही धक्कादायक घटना मुकुंदवाडीतील माँसाहेब चौकाजवळ शनिवारी (२८ फेब्रुवारी) संध्याकाळी घडली. मुकुंदवाडी पोलिसांनी लुटारू रिक्षाचालकाविरुद्ध सोमवारी (२ मार्च) गुन्हा दाखल केला आहे.
ओम संजय राऊत (वय १८, रा. दाभाडे गल्ली, गेवराई, जि. बीड) याने या प्रकरणात तक्रार दिली आहे. तक्रारीत म्हटले आहे, की तो आई, वडिलांसोबत राहतो. वाशिम येथे बी.एस्सी. नर्सिंगला शिक्षण घेतो. त्याचे मामा योगेश काळे हे रामनगर (मुकुंदवाडी) येथे राहतात. शनिवारी (२८ फेब्रुवारी) मामाला भेटण्यासाठी तो रामनगरला आला होता. त्यानंतर मूळगावी जाण्यासाठी संध्याकाळी साडेपाचला सिडको बसस्थानकाकडे निघाला. एक रिक्षा रामनगरकडून आली. रिक्षावाला ओमला म्हणाला, की कुठे जायचे आहे. ओमने सिडको बसस्थानक सांगिल्यानंतर त्याने ओमला रिक्षात बसवून घेतले. रिक्षात दोन प्रवासी होते.
मात्र चालक रिक्षा सिडको बसस्थानकाकडे न घेता धूत हॉस्पिटलकडे घेऊ लागला. त्यामुळे ओमला संशय आला. त्याने विचारणा केली असता रिक्षात प्रवासी म्हणून बसलेल्यांनी शिवीगाळ करून ओमला मारहाण सुरू केली. रिक्षात बसून ते त्याला अजिंठा फार्मा कंपनीकडे घेऊन गेले. मारहाण करून त्याचा मोबाइल हिसकावला. मोबाइलच्या फोन पेवरून जबरदस्तीने ३६० रुपये ट्रान्सफर करून घेतले. नंतर ओमच्या खिशातून जबरदस्तीने २ हजार रुपये काढून घेतले. १० हजार रुपयांचा मोबाइल हिसकावून ओमला रिक्षातून ढकलून देत पसार झाले. ओम इतका घाबरलेला होता, की त्याने रिक्षाचा नंबरही बघितला नाही. अधिक तपास पोलीस उपनिरीक्षक संजय बहुरे करत आहेत.
.jpeg)
