छत्रपती संभाजीनगर (मेट्रोपोलिस पोस्ट वृत्तपत्राच्यासौजन्याने) : गारखेड्यातील मोहटादेवी मंदिरात पूजेसाठी जात असलेल्या ६६ वर्षीय वृद्धेची सोन्याची पोत हिसकावून पसार झालेल्या त्रिकूटाला पुंडलिकनगर पोलिसांनी अखेर अटक केली असून, त्यांच्याकडून १ लाख ९ हजार रुपयांचा मुद्देमाल जप्त केला आहे.
अटक केलेले त्रिकूट अट्टल गुन्हेगार असून, त्यातील कृष्णा ऊर्फ कुल्या माणिकराव सोळंके (वय २६, रा. गजानननगर) याला २०२५ मध्ये दोन वेळा अटक झाली होती, त्याच्याविरुद्ध चोरी, लुटमारीचे १० गुन्हे दाखल आहेत, सध्या तो जामिनावर होता. शुभम मदन राठोड (वय २४, रा. भारतनगर) हा हत्येसारख्या गंभीर गुन्ह्यात जामिनावर बाहेर होता, तर मयूर विरेंद्रसिंह दोटियाल (वय २१, रा. पुंडलिकनगर) असे तिसऱ्याचे नाव आहे. सुमन निकम (रा. गारखेडा) यांनी या प्रकरणात तक्रार दिली होती.
३१ ऑक्टोबरला पहाटे पाचच्या सुमारास सुमन वसंतराव निकम (वय ६६, रा. गारखेडा) या घराजवळीलच मोहटादेवी मंदिरात काकडा आरतीसाठी जात होत्या. त्याचवेळी ट्रिपलसीट आलेल्या दुचाकीस्वारांनी त्यांच्या गळ्यातील सोन्याची पोत, कानातील दागिने, एक मोबाइल मारहाण करत लुटून नेला होता. पोलीस निरीक्षक अशोक भंडारे यांच्या सूचनेवरून विशेष पथकातील पोलीस उपनिरीक्षक अर्जुन राऊत, रेशीम कोळेकर, अंमलदार संदीप बिडकर, अजय कांबळे, कल्याण निकम, अंकुश वाघ यांच्या पथकाने परिसरातील सीसीटीव्ही फुटेजच्या आधारे तपास सुरू केला. तिघांनीही तोंडाला कापड बांधलेले असल्याने ओळख पटण्यात अडचण येत होती. युनिक हेअरस्टाइल पोलिसांच्या नजरेत भरली. त्यांनी शुभम राठोडला ताब्यात घेऊन कसून चौकशी केली असता त्याने गुन्ह्याची कबुली दिली. त्याने साथीदारांचीही नावे सांगितली. त्यानंतर पोलिसांनी कृष्णा आणि मयूरच्याही मुसक्या आवळल्या.
अमन शेखलाही अटक
आनंदनगरात २३ ऑक्टोबरला रामदास भानुदास वाघ यांच्या घरात घुसून चोरट्यांनी दोन मोबाइल व सोन्याचे दागिने चोरून नेले होते. ही चोरी कृष्णा, शुभमने अमन मेहबूब शेख (वय २१, रा. भारतनगर) याच्यासोबत मिळून केल्याचे चौकशीत समोर आले. पोलिसांनी अमनच्या मुसक्या आवळल्या. दोन्ही गुन्ह्यांतील दागिने, तीन मोबाइल पोलिसांनी जप्त केले आहेत.
कृष्णा, शुभमला जामिन मिळतो कसा?
कृष्णा आणि शुभम दोघेही अट्टल गुन्हेगार आहेत. पोलीस त्यांना अटक करण्यासाठी जिवाची बाजी लावतात, मात्र काही दिवसांतच ते जामिनावर सुटून पुन्हा गुन्हे करण्यासाठी सज्ज होतात, असे या प्रकारात दिसून आले आहे. शुभमविरुद्ध नोव्हेंबर २०२३ मध्ये गुरुदत्तनगरमध्ये गणेश राऊत या तरुणाच्या हत्येचा आरोप असून, त्याच्याविरुद्ध जवाहरनगर, पुंडलिकनगर पोलीस ठाण्यात दोन गंभीर गुन्हे दाखल आहेत. कृष्णाचा भाऊ गजानन हा काही महिन्यांपूर्वी दरोड्याच्या तयारीत असताना सिडको एमआयडीसी पोलिसांनी पकडला होता. तेव्हापासून तो तुरुंगात आहे. त्याच्या जामिनासाठी पैशांची जुळवाजुळव करताना अट्टल गुन्हेगार असलेल्या कृष्णाने रामदास वाघ यांच्या घरातून चोरलेले ७० हजार रुपये खर्च केले होते. यापूर्वी कृष्णाला २०२५ मध्ये दोनदा अटक झाली होती. जामीन मिळताच त्याच्या गुन्हेगारी कारवाया पुन्हा सुरू होतात.
.jpeg)
