छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : मध्यवर्ती बसस्थानकावर चोर, टवाळखोरांचा वावर वाढला आहे. पोलीस तैनात असतात, पण त्यांनाही हे चोर, टवाळखोर जुमानत नाहीत, असे चित्र आहे. काही दिवसांपूर्वी तर एका टवाळखोराने पोलिसालाच बेदम मारहाण केली होती. आता ३ चोरट्यांचा प्रताप समोर आला आहे. नागरिकांनाच अखेर आक्रमक रुप धारण करावे लागले. वृद्धेच्या हातातील सोन्याच्या बांगड्या चोरट्याने चोरल्या. वृद्धेने आरडाओरड करताच नागरिकांनी चोराला पकडले. त्याचे २ साथीदार लगेच पळून गेले. पकडलेल्या चोरट्याला नागरिकांनी अक्षरशः काळानिळा होईपर्यंत झोपून काढले. ही घटना रविवारी (५ ऑक्टोबर) सायंकाळी घडली.
क्रांती चौक पोलिसांनी या चोरट्याला ताब्यात घेत अटक केली आहे. सूरज सुरेश टिंडगे (वय ३४, रा. ठाणे) असे त्याचे नाव आहे. सूत्रांच्या माहितीनुसार, लता गायकवाड (वय ६५, रा. संभाजी कॉलनी, छत्रपती संभाजीनगर) या नातेवाइकांसह चाळीसगावला जाण्यासाठी मध्यवर्ती बसस्थानकावर आल्या. एसटी बसमध्ये चढत असताना त्यांच्या हातातील ४ तोळ्यांच्या बांगड्या चोरट्याने काढून घेतल्या. ही बाब लक्षात येताच लता यांनी आरडाओरड केली. त्यामुळे त्यांच्या मागे उभ्या तिघांनी पळ काढला. पळणारे चोर असल्याचे लक्षात आल्यावर नागरिकांनी त्यांचा पाठलाग केला. त्यातील एक जण सूरज हाती लागला, तर त्याचे साथीदार सुमित गाडगे व राजेश गारुंगे (दोघे रा. ठाणे) पळून गेले. जमावाने सूरजवर हात साफ करून घेतले. नंतर पोलिसांच्या ताब्यात दिले.
.jpg)
.jpeg)
