छत्रपती संभाजीनगर (मेट्रोपोलिस पोस्ट वृत्तपत्राच्या सहकार्याने) : जोया नावाच्या मुलीने व्यापाऱ्याला हनी ट्रॅपमध्ये अडकवत नारेगावमध्ये भेटायला बोलावले. व्यापारी आल्यानंतर अचानक तिघांनी आमच्या बहिणीचे आयुष्य खराब केले असे म्हणत बेदम मारहाण सुरू केली. मारहाणीचा व्हिडीओही बनवला. व्हिडीओ व्हायरल करायचा नसेल तर ५ लाख रुपये दे, असे धमकावले आणि तत्काळ १ लाख रुपयेसुद्धा घेतले. व्यापाऱ्याने सिडको एमआयडीसी पोलीस ठाण्यात आज, ११ सप्टेंबरला तक्रार दिली. त्यावरून पोलिसांनी जोया आणि ३ अनोळखी व्यक्तींविरुद्ध गुन्हा दाखल केला आहे.
गारखेडा परिसरातील हुसेन कॉलनीतील ४८ वर्षीय जहीर (नाव बदलले आहे) यांनी या प्रकरणात तक्रार दिली आहे. तक्रारीनुसार, २ सप्टेंबरला दुपारी दीडला हनुमान चौक सिडको एन ४ येथे त्यांच्या दुकानाचे काम चालू असल्याने ते दुकानात होते. त्यांना एका मुलीने कॉल केला व माझ्याशी मैत्री कर, असा हट्ट धरला. जहीर यांनी तिला नाव विचारले असता तिने जोया असे सांगितले. जहीर यांना संशय आल्याने त्यांनी मैत्री करण्यास नकार दिला. त्यानंतर तिने परत त्यांना वारंवार कॉल केले. माझ्याशी मैत्री करा, असे म्हणू लागली. जहीर यांनी घाबरून तिचा नंबर ब्लॅकलिस्टमध्ये टाकला.
सोमवारी (८ सप्टेंबर) जोयाचा त्यांना दुसऱ्या नंबरवरून कॉल आला. ती म्हणाली, की तुम्ही माझा मोबाईल क्रमांक ब्लॅकलिस्टमध्ये का टाकला आहे? मला तुम्हाला भेटायचे आहे. एकदा मला भेटा, असे म्हणाली. जहीर यांनी सांगितले, की मी तुला भेटू शकत नाही. मात्र तरीही ती वारंवार त्यांना कॉल करून भेटण्यासाठी हट्ट करू लागली. त्यामुळे जहीर यांनी तिला भेटण्याचा निर्णय घेतला. तिने त्यांना नारेगाव येथे तिच्या मैत्रिणीच्या रूमवर भेटायला बोलावले. सोमवारी दुपारी चारला ते नारेगाव येथे गेले. तिने त्यांना कॉल करून पत्ता सांगितला. मात्र पत्ता सांगताना बराच वेळ वाया घालवला.
अखेर कौसरपार्क नारेगाव येथे बोलावले. तिथे जहीर गेले असता अचानक तेथे ३ अनोळखी व्यक्ती आले. त्यातील एक व्यक्ती म्हणाला, की तू माझ्या बहिणीचे आयुष्य एक महिन्यापासून खराब करत आहेस. आज मी तुला ठार मारतो, असे म्हणून तो अंगावर धावून येत शिवीगाळ करू लागला. हाताचापटाने, लाथाबुक्क्याने मारहाण करून तिघांनी बेल्टने जहीर यांना मारहाण केली. त्यापैकी एकाला ते मोसीन नावाने बोलत होते. त्यातील एक व्यक्ती त्याच्या मोबाईलमध्ये जहीर यांना मारत असल्याचा व्हिडीओ बनवत होता. मारहाण करून त्यांनी जहीर यांच्या खिशातील ५ हजार ३०० रुपये काढून घेतले.
तुझा व्हिडीओ व्हायरल करू द्यायचा नसेल तर पाच लाख रुपये दे, असे धमकावले. त्यामुळे जहीर हे घाबरून गेले. जहीर यांनी त्यांच्या चिकलठाण्यातील मित्राला कॉल केला व सांगितले, की मला एक लाख रुपये तात्काळ लागतात. तुमच्याकडे एक व्यक्ती व त्यासोबत फरान नावाचा मुलगा हे दोघे नारेगाव येथील हॉटेल सबेरा येथे येतील. त्यांच्याजवळ पैसे द्या... पैशाचे बोलणे होताच तिघांनी लगेचच लोकांनी फोन जहीर यांच्याकडून फोन घेत कट केला. त्यानंतर काही वेळाने जहीर यांच्या मित्राने पैसे दिल्याचे सांगितले. त्यावेळी रात्रीचे ८ वाजले होते. जहीर यांची प्रकृती ठिक नसल्यामुळे त्यांनी तत्काळ पोलीस ठाण्यात येऊन तक्रार दिली नाही. अखेर आज, ११ सप्टेंबरला पोलिसांत तक्रार दिली. अधिक तपास पोलीस उपनिरीक्षक जगन्नाथ मेनकुदळे करत आहेत.
