छत्रपती संभाजीनगर (मेट्रोपोलिस पोस्ट वृत्तसेवा) : ओला टॅक्सीचालकाला अडवून दोघांनी कारची काच फोडत बेदम मारहाण केली. दगडाने मारून त्यांना जखमी केले. ही घटना पेठेनगरच्या डीपीजवळ सोमवारी (१ डिसेंबर) संध्याकाळी साडेसातच्या सुमारास घडली. छावणी पोलिसांनी दोन्ही टवाळखोरांविरुद्ध गुन्हा दाखल करून त्यांचा शोध सुरू केला आहे.
दिलीप शाहुबा इंगळे (वय ५६, रा. शाक्यनगर भीमनगर भावसिंगपुरा) यांनी या प्रकरणात तक्रार दिली आहे. ते पत्नी, दोन मुले व एक सून यांच्यासह राहतात. शहरात ओला टॅक्सी (MH 14 HG 6926) चालवतात. रविवारी (३० नोव्हेंबर) संध्याकाळी साडेसातच्या सुमारास दिवसभर टॅक्सी चालवून घराकडे जात असताना पेठेनगरच्या डीपीजवळ आले असता शाक्यनगरकडे जाण्यासाठी वेग कमी करत टॅक्सी कार स्विफ्ट डिझायरने वळण घेतले. त्याचवेळी तेथे उभ्या दोघांनी जोरजोरात कारच्या दरवाजावर मारून व हॅण्डल ओढून दार उघड, असे म्हटले.
दिलीप इंगळे यांनी घाबरून दार उघडले नाही. त्यावेळी दोघांनी कारची समोरील काच फोडली. त्यामुळे इंगळे हे कारमधून उतरले. दोघांनी त्यांना पकडून शिवीगाळ करत हाता चापटाने मारहाण सुरू केली. डोक्यात दगड मारून जखमी केले. त्याचवेळी तिथे उभ्या अन्य दोघांनी मदतीला धावून इंगळे यांची सुटका केली. हल्लेखोर दोघांपैकी जाड व्यक्तीच्या हातात चाकू होता. त्याने तो मारण्याचा प्रयत्न केला. दोघांनीही धमकी दिली की, पोलीस ठाण्यात गेला तर तुला जीवे मारू. घाटी रुग्णालयात उपचार घेतल्यानंतर इंगळे यांनी छावणी पोलीस ठाण्यात धाव घेऊन तक्रार दिली. हल्लेखोरांची नावे इंगळे यांना कळली असून, त्यातील एक संकेत जाधव व दुसऱ्याचे नाव करण भांडे असल्याचे त्यांनी तक्रारीत म्हटले आहे. अधिक तपास पोलीस अंमलदार शकील शेख करत आहेत.
.jpg)
.jpg)
