छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : वाळूज सिडको महानगर-१ मधील जय बॉइज होस्टेलच्या एका स्वतंत्र खोलीत राहणाऱ्या ४० वर्षीय अभियंत्याचा संशयास्पद मृतदेह आढळून आला आहे. संतोष बुधा वाघ त्यांचे नाव असून, वाळूज एमआयडीसीतील कॉस्मो कंपनीत काम करत होते, असे वसतिगृहातील प्रवेशपत्रावरून समोर येते. ते गेल्या वर्षभरापासून या वसतिगृहात एकटेच राहत होते.
मिळालेल्या माहितीनुसार, संतोष वाघ हे मूळचे कल्याण (पूर्व) येथील आहेत. त्यांचे वडील व आई हे डोणदिगर, ता. चाळीसगाव, जि. जळगाव येथे वास्तव्यास आहेत. संतोष वाघ यांचे लग्न दहा-बारा वर्षांपूर्वी झाले असून त्यांच्या पत्नीचे नाव अमृता आहे. त्यांना एक आठ वर्षांची मुलगी आहे. ते कॉस्मोच्या केमिकल विभागात कार्यरत होते, अशी माहिती मिळाली. शुक्रवारी (२७ सप्टेंबर) सकाळी संतोषच्या भावाने त्याला फोन केला, मात्र तो फोन लागत नसल्याने संशय निर्माण झाला. याबाबत भावाने वसतिगृह चालकाला कळवल्यानंतर पोलिसांना माहिती देण्यात आली.
माहिती मिळताच पोलीस उपनिरीक्षक शेख सलीम यांनी घटनास्थळी भेट देऊन पाहणी केली. पोलिसांनी त्यांच्या भावाशी संपर्क साधला असून, या प्रकरणी वाळूज एमआयडीसी पोलीस ठाण्यात आकस्मिक मृत्यूची नोंद करण्यात आली आहे. मृतदेह पुढील वैद्यकीय तपासणीसाठी शासकीय रुग्णालयात पाठवण्यात आला आहे. या घटनेमुळे वाळूज परिसरात एकच खळबळ उडाली आहे.
.jpg)
.jpeg)
