खळबळजनक : छत्रपती संभाजीनगरमध्ये धूत हॉस्पिटलच्या ICU मधून रुग्णाची सोन्याची अंगठी गेली चोरीला!, स्टाफपैकीच कुणीतरी चोरल्याची शंका..., रुग्णालयाची भूमिका संशयास्‍पद

छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगरातील प्रसिद्ध धूत हॉस्पिटलमध्ये आयसीयूत उपचार सुरू असताना रुग्णाची ५० हजार रुपयांची सोन्याची अंगठी चोरीला गेल्याने खळबळ उडाली आहे. सिडको एमआयडीसी पोलिसांनी या प्रकरणात गुन्हा दाखल करून तपास सुरू केला आहे. याप्रकरणात रुग्णालयाची भूमिका संशयास्पद भासत आहे. कारण रुग्णाच्या पत्नीने रुग्णालय प्रशासनाला सीसीटीव्ही फूटेजबाबत विनंती केली. मात्र त्यांनी प्रतिसाद दिला नाही. सीसीटीव्ही फूटेज दाखवल्याने असे कोणते बिंग फुटणार होते, असा प्रश्न निर्माण झाला आहे.

सुनिता अनिल जवकर (वय ५१, रा. टिळक रोड) यांनी याप्रकरणात तक्रार दिली आहे. त्या मुलगा, सून, नातवांसह राहतात. बांगड्याचा व्यवसाय करतात. त्यांचे पती अनिल नारायण जवकर (वय ५७) यांना कँसर असल्याने त्यांच्यावर बीड येथील विवेकानंद हॉस्पिटलमध्ये उपचार चालू असताना ते बेशुध्द झाल्याने त्यांना पुढील उपचारासाठी २७ ऑक्टोबरला छत्रपती संभाजीनगरच्या धूत हॉस्पिटलमध्ये दाखल केले होते. आयसीयूत उपचारादरम्यान त्यांच्या उजव्या हातात १० ग्रॅम वजनाची सोन्याची अंगठी होती.

उपचार सुरू असल्याने सुनिता आणि कुटुंबीयांना आतमध्ये येऊ देत नव्हते. २९ ऑक्टोबरला दुपारी दीडच्या सुमारास त्या पती अनिल यांना बघायला गेल्या असता उजव्या हातातील सोन्याची अंगठी दिसून आली नाही. तेव्हा अनिल हे बेशुध्द अवस्थेतच असल्याने त्या त्यांना अंगठीबाबत काही विचारू शकत नव्हत्या. त्यामुळे त्यांनी ICU मधील डॉक्टर व तेथील स्टाफला अंगठीबाबत विचारले. त्यांनी अगंठीबाबत काही माहीत नसल्याचे सांगितले. सुनिता यांनी पतीच्या सोन्याची अंगठीचा आजूबाजूला व इतर ठिकाणी शोध घेतला. मात्र अंगठी कोठेही मिळून आली नाही.

त्यामुळे त्यांची खात्री झाली की धूत हॉस्पिटलमधील उपचारादरम्यान ICU स्टाफमधील कोणीतरी अनिल यांची सोन्याची अंगठी चोरली आहे. उपचारादरम्यान ३० ऑक्टोबरला पहाटे सव्वा बाराच्या सुमारास अनिल यांचा मृत्यू झाला. त्यामुळे सुनिता या अंत्यविधीकामी बीड येथे परतल्या. त्यानंतर त्यांनी बुधवारी छत्रपती संभाजीनगरला येऊन सिडको एमआयडीसी पोलीस ठाण्यात तक्रार दिली. त्यावरून पोलिसांनी ५० हजार रुपयांची अंगठी चोरणाऱ्या अज्ञात चोरट्याविरुद्ध गुन्हा दाखल केला आहे. अधिक तपास पोलीस अंमलदार जहीर शेख करत आहेत.