छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : एपीआय कॉर्नरजवळील सागर लॉन्ससमोर कारचालक व त्याच्यासोबतच्या महिलेने राडा केला. भररस्त्यात सानिया मोटर्सच्या कर्मचाऱ्याला बेदम मारहाण करत कपडे फाडले. सिडको एमआयडीसी पोलिसांनी याप्रकरणात महिलेला अभय दिले असून, केवळ कारचालकाविरुद्धच गुन्हा दाखल केला आहे. कर्मचाऱ्याने तक्रारीत महिलेनेही मारहाण केल्याचे म्हटले आहे.
मनेश कल्याण घोरपडे (वय २५, रा. अंबिकानगर गल्ली नं. ४ मुकुंदवाडी) याने या प्रकरणात तक्रार दिली आहे. तो एपीआय कॉर्नर सागर लॉन्सच्या बाजूला सानिया मोटर्स येथे ७ वर्षांपासून कामाला आहे. तो चारचाकी वाहनांची कोटींग करून ती गाडी शोरूमला आणून ठेवण्याचे काम करतो. मंगळवारी (३० सप्टेंबर) रात्री साडेआठच्या सुमारास मनेश शो रूमची नवी नेक्सॉन कार ही सानिया मोटर्समध्ये आणून ठेवत असताना सागर लॉन्स येथे दांडियाचा कार्यक्रम असल्याने गाड्यांची गर्दी झाली होती.
गाडीखाली उतरून गाडीसाठी रस्ता मोकळा करत असताना कारचालक (MH 20 HH 4272) व त्यांच्यासोबत एक महिला असे गाडीखाली उतरले. मी कोण आहे तुला माहीत आहे का, असे त्याने म्हटले. अश्लील शिवीगाळ करून तू माझी हिस्ट्री काढ, मग कळेल तुला मी कोण आहे, असे धमकावले. त्याच्या सोबतच्या महिलेनेही शिवीगाळ करून मारहाण केली. त्या व्यक्तीने मनेशचे कपडे फाडून चष्मा फोडला.
हा प्रकार पाहून सानिया मोटर्स येथे काम करणारा निरंजन राठोड हा भांडण सोडविण्यास आला असता त्यालाही त्या दोघांनी हाताचापटांनी मारहाण केली. त्याच्या पाठीवर मारून जखमी केले. मनेशने सिडको एमआयडीसी पोलीस ठाणे गाठून तक्रार दिली. त्यावरून पोलिसांनी कारचालकाविरुद्ध गुन्हा दाखल केला आहे. मनेशवर घाटी रुग्णालयात उपचार करण्यात आले. अधिक तपास पोलीस अंमलदार चंदनसिंह उसारे करत आहेत.
.jpeg)
